لاہور (نیوز ڈیسک ) پہلی تھری ڈی اینیمیٹڈ پاکستانی فلم ”تین بہادر“کا پریمیئر شو پیش کر دیا گیا ، فلم میں تین بہادر بچوں کے ذریعے بہادری اور ملک و قوم کے لئے کچھ کر گزرنے کا پیغام دیا گیا ہے۔ لاہور کے سینما گھروں میں ”تین بہادر“ فلم نمائش کے لئے پیش کر دی گئی ، فلم کی کہانی بچوں کی اخلاقی ، جسمانی اور ذہنی تخلیقات کی عکاس ہے۔ فلم میں بچوں اور والدین دونوں کے لئے مثبت پیغام دیا گیا ہے۔ آسکر ایوارڈ جیتنے والی فلم کی ہدایت کارہ شرمین عبید چنائے نے فلم میں یہ بتانے کی کوشش کی ہے کہ ہر بچے کا ایک سپر ہیرو ہوتا ہے ، جسے چیلنچ نہیں کیا جا سکتا۔ یہ فلم ایک افسانوی قصبے روشن بستی کی ہے جس کا حال پاکستانی شہروں جیسا ہے۔ فلم ”تین بہادر“ میں گلوکار شیراز اپل نے گیت ” رونقیں ” گا کر یقینا سبھی کے چہروں پر خوشیاں بکھیرنے کے لئے اہم کردار ادا کیا ہے۔ یہ فلم یقینا نئی نسل کے لئے اہمیت کی حامل ثابت ہو گی اور اس کی کہانی سے بچے نہ صرف ملکی مستقبل کا خیال رکھنے کی کوشش کریں گے بلکہ اپنے بڑوں کا ادب کرنا بھی سیکھیں گے۔