لاہور (نیوز ڈیسک) آج کل سوشل میڈیا کا کردار ہر معاملے میں بہت اہم ہے، سوشل میڈیا نے کوسوں میل دور بیٹھے لوگوں کو ملایا ہے، کبھی کوئی خاتون کینیڈا اور کبھی کوئی خاتون جرمنی سے پاکستانی نوجوان کی محبت میں پاکستان چلی آتی ہے تو کہیں پاکستان میں بھی ضرورت رشتہ کے لیے سوشل میڈیا کا سہارا لیا جاتا ہے، ایسے ہی ایک اشتہار نے سوشل میڈیا پر دھوم مچا رکھی ہے،
اس اشتہار میں کہا گیا ہے کہ ایک نوجوان لڑکی جو کہ سافٹ وئیر انجینئر اور ذات شیخ ہے اور ایک اچھے گھرانے سے تعلق رکھتی ہے، لڑکی پی آئی اے ہاؤسنگ سوسائٹی کی رہنے والی ہے اور ملازمت پیشہ ہے اس کی ماہانہ تنخواہ ایک لاکھ روپے ہے، اس کو ایک مناسب رشتے کی ضرورت ہے۔ سوشل میڈیا پر اشتہار کے وائرل ہونے کے بعد لوگوں نے طرح طرح کی پیشکشیں کرنا شروع کر دیں، ایک صارف نے اپنے بیٹے کے بارے میں لکھا کہ میرا بیٹا دس لاکھ سے زائد تنخواہ لیتا ہے اور وہ لاہور سے تعلق رکھتا ہے مگر اب کینیڈا جا چکا ہے اور وہاں مرسڈیز چلاتا ہے، اگر رشتہ پسند ہو تو میں اس کا والد ہوں رابطہ کریں۔ ایک اور صارف نے انتہا ہی کر دی اس نے لکھا کہ میرا نام عثمان ہے اور میں لاہور کا رہنے والا ہوں، میرے پاس شیر کے دو بچے اور ایک بڑی کھوتی ہے، ایک صارف نے اپنے دوست کے لیے رشتہ مانگتے ہوئے لکھا کہ اس کا تعلق پی سی ایس آئی آر لاہور سے ہے اور وہ اپنی والدہ سے تین ہزار روپے جیب خرچ لیتا ہے۔ اس طرح کے کئی کمنٹس سامنے آئے ہیں، صارفین نے اس کے ردعمل میں انتہائی افسوس کا اظہار کیا اور لکھا کہ اس طرح کے کمنٹس کی وجہ سے سنجیدہ امیدواروں کی بھی حوصلہ شکنی ہو گی۔
