اسلام آباد (نیوز ڈیسک)پاکستان تحریک انصاف کے نو منتخب اراکین سینیٹ ولید اقبال اور سیمی ایزدی نے حلف اٹھا لیا۔ جمعہ کو ایوان بالا کے اجلاس کے آغاز پر قائمقام چیئرمین سینٹ سلیم ایچ مانڈوی والا نے ولید اقبال اور سیمی ایزدی سے بطور سینیٹرز حلف لیا۔ اس موقع پر سینیٹر سیمی ایزدی نے اظہار خیال کرتے ہوئے کہا کہ اس ایوان کا حصہ بننے پر خوشی ہو رہی ہے، وزیراعظم اور پاکستان تحریک انصاف کے چیئرمین عمران خان نے ان پر جو اعتماد کیا ہے اس پر وہ اس کی شکرگزار ہیں۔ انہوں نے

کہا کہ ملک مشکل دور سے گزر رہا ہے، مل کر ملک کے لئے بہت کچھ کرنا ہے،  سینیٹر ولید اقبال نے کہا کہ ایوان بالا کا رکن بننا اعزاز کی بات ہے، چیئرمین پاکستان تحریک انصاف نے سینٹ کا ٹکٹ دے کر جس اعتماد کا اظہار کیا اس پر ان کا شکرگزار ہوں، مجھے ووٹ دینے پر اراکین پنجاب اسمبلی کا شکر گزار ہوں، سب کو اپنے اعمال کا جوابدہ ہونا ہے، ہم نے ملک کو بدعنوانی سے پاک کرنا ہے، قانون سب کے لئے برابر ہے، ہم آئین اور قانون کی بالادستی چاہتے ہیں۔