نائس (نیوز ڈیسک) کانز فلمی میلے کی انتظامیہ نے رواں برس اعلان کیا تھا کہ فنکاروں کو ریڈ کارپٹ پر سیلفی لینے کی اجازت نہ ہوگی کیونکہ کوئی بھی شخص سیلفی میں خوبصورت دکھائی نہیں دیتا۔ معلوم ہوتا ہے کہ بالی ووڈ حسینہ ایشوریا رائے اس قانون سے بے خبر تھیں یا پھر انہوں نے اسے اہمیت کے قابل نہ سمجھا کیونکہ اداکارہ ریڈ کارپٹ پر دیگر شرکا کے ہمراہ سیلفی لیتی دیکھی گئیں۔ فلم کیرول کے پریمیئر کے موقع پر ایشوریا نے جو کہ خود بھی کاسمیٹکس برانڈ لوریئل کی برینڈ ایمبیسڈر ہیں، امریکی اداکارہ اور لوریئل کی برانڈ ایمبیسڈر ایوا لونگوریا کے ہمراہ ریڈ کارپٹ پر سیلفی لی۔ ایوا اور ایشوریا کئی برس قبل کانز فلمی میلے میں ہی پہلی بار ملی تھیں اور تب سے اب تک دونوں کے بیچ گہری دوستی دیکھنے کو مل رہی ہے۔ دلچسپ امر یہ ہے کہ ایوا نے اس موقع پر ایک ایک لمحے کی سیلفیز لی ہیں اور انہیں اپنے انسٹاگرام اکاو¿نٹ پر اپ لوڈ کیا ہے۔