ممبئی (این این آئی)بھارتی اداکارہ اور آئی پی ایل فرینچائز ‘کنگز الیون پنجاب’ کی شریک بانی پریتی زنٹا نے انوکھا مطالبہ کرتے ہوئے کہاہے کہ آئی پی ایل میں میچ فکسنگ سے بچنے کیلئے سٹے بازی کو قانونی قراردیا جانا چاہیے۔غیرملکی میڈیا رپورٹس کے مطابق انہوں نے یہ مطالبہ بی سی سی آئی کی گورننگ کونسل کی میٹنگ کے دوران کیا۔انہوں نے انڈین پریمئر لیگ میں میچ فکسنگ سے بچاؤ کیلئے سٹے بازی کو قانونی قرار دیئے جانے کی تجویز دی۔انہوں نے کہا کہ یہ بات سننے میں

بہت ناگوار محسوس ہوگی لیکن اگر سٹے بازی کو قانونی قرار دے دیا جائے تو اس سے لیگ کے دوران میچ فکسنگ جیسے سائیڈ ایفیکٹس خود دم توڑ جائیں گے۔اداکارہ کا کہنا تھا کہ سٹے بازی کو قانونی قرار دے دیا جائے تو اس سے سرکاری خزانے کو بھی بہت فائدہ ہوگا، اس کا استعمال ملکی ترقی اور انفراسٹرکچر کی بہتری کیلئے ہوگا۔انہوں نے یہ جواز پیش کیا کہ سٹے بازی غیر قانونی ہونے کی وجہ سے یہ پیسہ غیر قانونی ہتھیاروں اور منشیات کے کاروبار میں استعمال ہوتا ہے۔