کراچی(نیوز ڈیسک) ٹیلی ویڑن ڈراموں کی معروف اداکارہ عائشہ عمر نے کہا ہے کہ آرٹسٹ کو ور اسٹائل ہونا چاہئے۔ میں ماڈلنگ، ایکٹنگ، گلوکاری اور اب کمپیئرنگ کے شعبے میں بھی کام کر رہی ہوں۔ میرے مداح میری بہت پذیرائی کرتے ہیں۔ ان خیالات کا اظہار انہوں نے کیٹ واک کی جانب سے گالف کلب میں منعقدہ پی ایس او اسمارٹ کارڈ کی تقریب میں غیر رسمی بات چیت کرتے ہوئے کیا۔ اداکارہ عائشہ عمر کا کہنا ہے کہ لائیو پرفارمنس کا رسپانس بہت اچھا ملتا ہے۔
تقریب میں شریک فلم ساز و ہدایتکار زیبا بختیار نے کہا کہ کراچی شہر میں ثقافتی تقریب کا انعقاد بے حد ضروری ہے۔ انہوں نے بتایا کہ میری فلم کی شوٹنگ تیزی سے جاری ہے۔ اس موقع پر بین الاقوامی شہرت یافتہ میوزیکل بینڈ اسٹرنگز نے شاندار پرفارمنس کا مظاہرہ کرتے ہوئے خوب داد و تحسین وصول کی۔ پی ایس او کے منیجنگ ڈائریکٹر نعیم یحییٰ نے تمام فنکاروں کی پرفارمنس کو سراہتے ہوئے فیول اسمارٹ کارڈ کے فوائد بھی بتائے۔ تقریب کی کمپیئرنگ احمد بٹ اور عائشہ عمر نے خوبصورت انداز میں کی۔