اسلام آباد،لاہور (مانیٹرنگ ڈیسک،سی پی پی) سابق وزیر داخلہ چودھری نثارنے کلثوم نواز کے انتقال پرافسوس کا اظہار کرتے ہوئے کہا ہے کہ بیگم کلثوم نواز ایک شفیق خاتون تھیں،ان کے انتقال پر نواز شریف اور ان کے اہلخانہ سے دلی افسوس کا اظہار کرتاہوں۔ میری دعا ہے اللہ تعالیٰ بیگم کلثوم نواز کو جنت الفردوس میں اعلیٰ مقام عطا فرمائے اور تمام اہل خانہ کو صبر جمیل عطا فرمائے۔دوسری جانب سابق خاتون اول کلثوم نواز کے انتقال پر تعزیتی قرارداد پنجاب اسمبلی

میں جمع کرا دی گئی، قرارداد مسلم لیگ ن کی حنا پرویز بٹ کی جانب سے جمع کرائی گئی۔پنجاب اسمبلی میں جمع کرائی گئی قرارداد کے متن میں کہا گیا ہے کہ یہ ایوان مادر جمہوریت محترمہ کلثوم نواز کے انتقال پر گہرے رنج و غم کا اظہار کرتا ہے، پاکستان ایک عظیم، جمہوریت پسند اور دلیر خاتون سیاستدان سے محروم ہو گیا، کلثوم نواز نے جمہوریت کی سر بلندی کیلئے اپنی جدوجہد جاری رکھی، یہ ایوان شریف خاندان کے ساتھ اظہار تعزیت اور دلی ہمدردی کا اظہار کرتا ہے۔