واشنگٹن( آن لائن ) امریکی نائب سیکریٹری دفاع کا کہنا ہے کہ امریکا اور پاکستان کے مابین دیگر معاملات میں اختلافات کے باوجود دفاع اور سکیورٹی کے شعبے میں ہمیشہ اچھے تعلقات جاری رہیں گے۔رینڈل جی شرائیور جو ایشیئن اور پیسفک سکیورٹی امور کے نائب دفاعی سیکریٹری ہیں، کا کہنا تھا کہ وہ دونوں ممالک کے درمیان احترام پر مبنی تعلقات کے لیے خاصے پر امید ہیں جس سے دونوں کو فائدہ پہنچے۔
یومِ دفاع کے موقع پر امریکا میں پاکستانی سفارت خانے میں منعقدہ تقریب سے خطاب کرتے ہوئے ان کا کہنا تھا کہ امریکی سیکریٹری آف اسٹیٹ مائیک پومپیو اور جوائنٹ چیف آف اسٹاف چیئرمین جنرل جوزف ڈنفرڈ کے دورہ اسلام آباد سے تعلقات میں ایک نیا آغاز ہوگا۔ان کا کہنا تھا کہ فوجی تعلقات ہمیشہ دونوں ممالک کے باہمی تعلقات کی مضبوط بنیاد رہے ہیں اور اس میں کبھی تبدیلی دیکھنے میں نہیں آئی، تاہم انہوں نے اس بات کا اعتراف کیا پاکستان کے قیام کے دن سے تعلقات میں کچھ سقم ضرور ہیں۔تاہم ان کا کہنا تھا کہ دہشت گردی کے خلاف جنگ میں پاکستان امریکا کاایک دوست، ایک حمایتی اور اہم ساتھی تھا اور آئندہ بھی اہم ساتھی رہے گا۔ان کا مزید کہنا تھا کہ ہم جانتے ہیں کہ پاکستان نے دہشت گردی کے خلاف جنگ میں کتنی قربانیاں دیں اور ہم انہیں غیر اہم نہیں سمجھتے، ہم تعلقات اور شراکت داری کو اہمیت دیتے ہیں۔اس بیان کے باوجود انہوں نے جنرل جوزف ڈنفرڈ کے اس بیان کو دہرایا جس میں انہوں نے کہا تھا کہ اب وہ وقت تھا کہ دونوں ممالک اپنے کیے گئے وعدوں پر عملدرآمد کریں۔نائب سیکریٹری دفاع کا مزید کہنا تھا کہ امریکا اور پاکستان کے دیگر معاملات میں آنیو الے اتار چڑھا کے برعکس فوجی تعلقات ہمیشہ ایک جیسے رہتے ہیں۔رینڈل جی شرائیور نیکہا کہ پاکستان نے ہمیشہ اہم معاملات میں امریکا کا ساتھ نبھایا ہے چاہے وہ القاعدہ کو محدود کرنے کی کوشش ہو یا داعش کو شکست دینے کی یا پھر اقوامِ متحدہ کے زیر اہتمام امن مشن بھیجنے کا اقدام، ان تمام معاملات میں تعاون سے کامیابی حاصل ہوئی ہے۔
