لندن(انٹرنیشنل ڈیسک)تقریباً دو سال سے زیادہ عرصے سے چھاتی کے کینسر میں مبتلا برطانوی نشریاتی ادارے کی معروف نیوز پریزنٹر ریچل بلینڈ چالیس سال کی عمر میں انتقال کر گئیں، انہوں نے موت سے ایک روز قبل ہی سوشل میڈیا پر پیغام جاری کیا تھا کہ وہ چند دنوں کی مہمان ہیں۔غیرملکی خبررساں ادارے کے مطابق برطانوی نشریاتی ادارے ریڈیو فائیو کے سامعین کے لیے ریچل بلینڈ کی آواز بہت جانی پہچانی تھی کیونکہ وہ ریڈیو فائیو پر خبریں پڑھنے کے علاوہ دیگر پروگراموں کی میزبانی بھی کرتی رہی ہیں۔ریچل کے خاندان والوں نے ان کی موت

کی تصدیق کرتے ہوئے کہا کہ وہ ایک نہایت ہی باصلاحیت براڈ کاسٹر ہونے کے علاوہ نہایت ہی اچھی بیٹی، بہن، خالہ، بھانجھی، بیوی، اور اپنے پیارے بیٹے فریڈی کی ماں تھیں۔آخری دنوں میں وہ اپنے دو سالہ بیٹے کے لیے ایک ڈائری میں یادیں تحریر کر رہی تھیں۔گذشتہ روز ہی ریچل بلینڈ نے سوشل میڈیا پر اعلان کیا تھا کہ دوستو مجھے افسوس ہے کہ میرا وقت آگیا ہے۔ اچانک مجھے بتایا گیا ہے کہ میرے پاس صرف چند دن اور ہیں۔ میں آپ سب کی بہت شکرگزار ہوں۔ریچل ایک لاعلاج کینسر کے مرض میں مبتلا تھیں، اور نومبر سنہ 2016 میں ڈاکٹروں نے چالیس سالہ صحافی کو بتایا دیا تھا کہ انہیں بریسٹ کینسر ہے۔