اسلام آباد(مانیٹرنگ ڈیسک)عمران خان نیک، پاک اور پاکیزہ ، پاکستان کی ڈوبتی معیشت کو بچائیں گے اور مشکل وقت میں کسی کو قربانی کا بکرا نہیں بنائیں گے، بھارتی سابق کرکٹر نویجت سدھو۔ تفصیلات کے مطابق پاکستان کے عام الیکشن میں تحریک انصاف کی فتح سامنے آنے کے بعد عمران خان اور ان کی جماعت کو نہ صرف ملک بلکہ دنیا بھر سے تہنیتی پیغامات ملنے کا سلسلہ جاری ہے اور عالمی شخصیات کے ساتھ ساتھ کھلاڑی بھی کپتان کو مبارکباد اور پاکستان کی نئی امید قرار دے رہے ہیں۔ ایسے میں سابق بھارتی کرکٹر،
سیاستدان اور کپل شرما شو کے جج نویجت سدھو نے پاکستان تحریک انصاف (پی ٹی آئی) کے چیئرمین عمران خان کو انتخابات میں کامیابی پر مبارکباد پیش کرتے ہوئے کہا ہے کہ وہ نیک، پاک اور پاکیزہ ہیں۔ نویجت سدھو کا کہنا تھا کہ ‘عمران خان بہترین لیڈر ہے، وہ ہمیشہ جوڑنے کی بات کرے گا، کبھی توڑنے کا نہیں کہے گا۔انہوں نے پیشگوئی کی کہ عمران خان پاکستان کی ڈوبتی معیشت کو بچائیں گے اورکسی کو قربانی کا بکرا نہیں بنائیں گے۔انہوں نے کہا کہ عمران خان سسٹم کو کچھ دینے آیا ہے، لینے نہیں۔
