اسلام آباد (نیو ز ڈیسک ) امریکی یونیورسٹی کے طالب علموں نے مصنوعی دل کو بجلی فراہم کرنے والا ایسا نظام تیار کیا ہے جو خود مریض کے بدن سے بجلی تیار کرسکتا ہے۔امریکی طالب علموں عمر کبیر اور جان برٹوس کی جانب سے تیار کیا گیا خاص قسم کا بیلٹ گھٹنوں پر پہننا پڑتا ہے جس میں نصب چھوٹی موٹریں گھٹنے کی حرکت سے بجلی بناتی ہیں جو دل کو بجلی فراہم کرنے والی بیٹری یا براہِ راست جسم کے اندر توانائی فراہم کرسکتی ہیں۔ اس نظام کو پہن کر چلنے سے 4 واٹ تک بجلی پیدا ہوتی ہے جو لیتھیئم آئن بیٹری پیک تک پہنچتی ہے۔طالب علموں کی جانب سے بنایا جانے والا یہ بیلٹ گھٹنے سے منسلک اس طرح منسلک ہوتا ہے جسے پہننے سے اکتاہٹ بھی نہیں ہوتی جب کہ طالب علموں کی ٹیم اب بجلی کو وائرلیس طریقے سے ترسیل کرنے کی کوشش کررہی ہے اس کے علاوہ دونوں طالب علم ایک ایسے نظام پر کام کررہے ہیں جس کے ذریعے چلتے ہوئے جوتے سے بھی بجلی بنانا ممکن ہوگا۔