لاہور (مانیٹرنگ ڈیسک )نگران وزیراعلیٰ پنجاب کے حلف اٹھاتے ہی شہباز شریف سے سیکورٹی واپس لےلی گئی ۔ خبر کی تفصیلات کے مطابق حسن عسکری نے آج صبح نگران وزیراعلی پنجاب کا حلف اٹھا یا ۔جس کے بعد شہباز شریف سے سیکیورٹی واپس لے لی گئی ۔ سابق وزیر اعلیٰ پنجاب کی سیکیورٹی پر

186سیکیورٹی اہلکار، جبکہ 10گاڑیاں مامور تھیں ، جنہیں آج واپس بلا لیا گیا ہے ۔ شہباز شریف کی سیکیورٹی پر مامور 10ایلیٹ فورس کے جوانوں کو بھی واپس بلا لیا گیا ۔ یہ تمام سیکیورٹی شہباز شریف کی رہائش گاہ پر مامور تھی ۔ جنہیں آج پنجاب کے نگران وزیراعلیٰ حسن عسکری نے حلف اٹھانے کے بعد واپس بلا لیا ہے ۔جبکہ دوسری جانب پاکستان مسلم لیگ کے سینئرمرکزی رہنما و سابق نائب وزیراعظم چودھری پرویزالٰہی نے کہا ہے کہ پروفیسر حسن عسکری پنجاب کی تاریخ کے سب سے زیادہ پڑھے لکھے وزیراعلیٰ ہیں اور وہ انشاء اللہ غیرجانبدار اور صحیح فیصلے کریں گے، ن لیگ صاف، شفاف اور غیر جانبدار انتخابات سے خوفزدہ ہے اور وہ محض اس لیے مخالفت کر رہی ہے کہ اسے نگران وزیراعلیٰ بھی اپنے گھر کا ہی چاہئے۔ چودھری پرویزالٰہی نے پروفیسر حسن عسکری رضوی کو نگران وزیراعلیٰ بننے پر ٹیلیفون پر مبارکباد پیش کی اور اس یقین کا اظہار کیا کہ وہ قوم کی توقعات پر پورے اتریں گے۔ چودھری پرویزالٰہی نے مزید کہا کہ پروفیسر حسن عسکری کے تجزئیے اور تبصرے ان کی غیرجانبدار سوچ اور حب الوطنی کے مظہر ہیں جنہیں پڑھے لکھے طبقوں کے علاوہ عام آدمی بھی اہمیت دیتا ہے۔ انہوں نے کہا کہ ن لیگ کی کیفیت کا اندازہ اس امر سے بخوبی لگایا جا سکتا ہے کہ ایک طرف تو اسے اپنے کئے پر نیب کا خطرہ ہے اور دوسری جانب پروفیسر حسن عسکری جیسے غیرجانبدار وزیراعلیٰ کے تقرر سے ان کو سمجھ نہیں آ رہی اور وہ اس الیکشن کمیشن کے ایک آئینی اور میرٹ پر کئے گئے متفقہ اقدام پر ایسی باتیں کر رہے ہیں حالانکہ پروفیسر حسن عسکری ایسی شخصیت کے حامل ہیں جن پر صاف شفاف الیکشن کیلئے غیرجانبدار کردار پر مکمل اعتماد کیا جا سکتا ہے لیکن ن لیگ ان کے خلاف اس لیے بیان بازی میں مصروف ہے کہ پنجاب میں فری اور فیئر الیکشن ہونے جا رہے ہیں۔

موضوعات:حسن عسکری سیکیورٹی شہباز شریف نگران وزیراعلیٰ پنجاب