لاہور ( نیوز ڈیسک) تحریک انصاف نے پنجاب اسمبلی میں الطاف حسین کے خلاف قرارداد لانے کا فیصلہ کیا ہے۔ قرارداد پیر کے روز اسمبلی سیکرٹریٹ میں جمع کرائی جائے گی۔ تحر یک انصاف کی قیادت نے الطاف حسین کی قومی سلامتی کے اداروں کے خلاف تقریر کا سختی سے نوٹس لیتے ہوئے پنجاب اسمبلی میں ایم کیو ایم کے قائد الطاف حسین کے خلاف قرارداد لانے کا فیصلہ کیا ہے۔ اس ضمن میں اپوزیشن لیڈر میاں محمود الرشید پیر کے روز اسمبلی سیکرٹریٹ میں قرارداد جمع کرائیں گے۔ میاں محمود الرشید کا کہنا ہے کہ الطاف حسین کا بیان قابل گرفت ہے اور وفاقی حکومت کو اس ضمن میں کارروائی کرنی چاہیئے۔ ان کا کہنا ہے کہ قرارداد میں نہ صرف الطاف حسین کے غیر ذمہ دارانہ بیانات کی مذمت کی جائے گی بلکہ اس ضمن میں قانونی کارروائی کا بھی وفاقی حکومت سے باضابطہ مطالبہ کیا جائے گا۔