اسلام آباد(نیوز ڈیسک) مائیکرو سافٹ نے ایک دلچسپ ویب پیج لانچ کیا ہے جو کسی بھی شخص کی تصویر کو جانچ کے اس کی عمر اور جنس کی شناخت کرلیتا ہے۔ یہ خبر پڑھنے میں جس قدر دلچسپ معلوم ہوتی ہے، اس کے استعمال کنندگان کیلئے اسی قدر جارحانہ ہے کیونکہ تاحال مائیکروسافٹ کے ذریعے اپنی درست عمرکا اندازہ لگانے میں کامیاب افراد کی شرح بے حد کم ہے۔ ہاو¿ اولڈ ڈاٹ نیٹ کے ایک استعمال کنندہ نے اپنی تمام تصاویر میں سے چھانٹ کے بہترین تصویر ویب سائٹ پر اپ لوڈ کی تاہم چند ہی سیکنڈز بعد سامنے آنے والے جواب نے مذکورہ یوزر کو چکرا کے رکھ دیا کیونکہ ویب سائٹ کا دعویٰ تھا کہ وہ دراصل اپنی عمر سے پندرہ برس بڑا ہے۔ اسی طرح جب ان کی ساتھی خاتون نے اپنی تصویر پیج پر اپ لوڈ کی تو ان کی عمر ، اصل سے بے حد کم بتائی گئی۔
اس ایپلی کیشن کے بارے میں ”دی ورج“ نے بہترین تبصرہ کیا ہے اور کہا ہے کہ دراصل یہ ویب پیج یہ نہیں بتاتا کہ آپ کتنے بوڑھے ہیں بلکہ یہ بتاتا ہے کہ آپ کتنے بوڑھے نہیں ہیں۔
اس بارے میں مائیکروسافٹ انتظامیہ کا کہنا ہے کہ وہ ڈیٹا اینالیسز اور مشین کے چہرے کے خدوخال کو پڑھنے کی صلاحیت پر کام کررہے ہیں اور کیلئے مختلف قسم کے تجربات کئے جارہے ہیں۔ مائیکروسافٹ ماہرین کے مطابق یہ ویب سائٹ صرف ایک دن میں تیاری کے بعد لانچ کی گئی اورتجرباتی طور پر کچھ لوگوں سے کہا گیا کہ وہ اس کا تجربہ کریں تاہم ہزاروں افراد اس ویب پیج پر امڈ آئے۔ ضروری نہیں ہے کہ مذکورہ ویب پیج پر اپنی ذاتی تصویر ہی اپ لوڈ کی جائے تاہم یہ ضروری ہے کہ تصویر تین ایم بی سے زیادہ کی نہ ہو۔ ادارے کا کہنا ہے کہ وہ ابھی اس کے فیچرز کو بہتر بنانے پر کام کررہے ہیں اور امید کرتے ہیں کہ مستقبل میں وہ اس ویب پیج کی کامیابی کو یقینی بنا لیں گے۔