سان فرانسسکو(نیوز ڈیسک) ٹیکنالوجی کمپنی ایپل کے بانی سٹیو جابز کو ان کے تخلیقی ذہن اور خوب سے خوب کی جستجو نے تحقیق اور دریافت کا استعارہ بنادیا۔
انہوں نے اپنی زندگی علمی جستجو اور بنی نوع انسان کے لیے نہایت مفید ثابت ہونے والی دریافتیں کرتے ہوئے گزاری۔ جب اکتوبر 2011میں ان کی وفات ہوئی تو خاندان کے دیگر افراد کے علاوہ ان کی بہن مونا سمپسن بھی ان کے سرہانے موجود تھیں۔ مونا کہتی ہیں کہ موت سے چند گھنٹے پہلے سٹیو نے اپنے بچوں اور اہلیہ پر ایک طویل نظر ڈالی اور پھر ان کے پیچھے خلا میں گھورتے ہوئے تین دفعہ پکارے ، ”اوہ واو، اوہ واو، اوہ واو “ اس کے بعد انکے حواس جاتے رہے اور چند گھنٹے بعد ان کی موت ہوگئی۔ اگرچہ سٹیو کے آخری الفاظ کا مطلب اور اس وقت ان کی ذہنی کیفیت کا اصل راز تو کسی انسان کو معلوم نہیں البتہ ان کے قریبی ساتھیوں کا خیال ہے کہ وہ دنیا سے رخصتی کے تجربے پر بھی کسی نئی دریافت کی طرح حیران اور متجسس تھے اور ایسے الفاظ ادا کر رہے تھے گویا کسی ننھے بچے کو کوئی نیا اور ان دیکھا منظر نظر آرہا ہو۔