چندی گڑھ(آئی این پی)) سابق بھارتی وزیر اعظم منموہن سنگھ نے کہا ہے کہ بیجا طاقت اور دولت انتخابی نظام کمزور کر رہی ہے، مفاد پرست عناصر کے ٹولے جمہوری اداروں پر قابض ہیں، انتخابی نظام کو بہتر بنانے کی ضرورت ہے۔ بھارتی میڈیا کے مطابق سابق بھارتی وزیر اعظم منموہن سنگھ نے کہا کہ بیجا طاقت اور دولت کے بل پر انتخابی نظام کمزور کیا جارہا ہے۔انہوں نے اس مسئلے سے نمٹنے کیلئے انتخابی نظام کو بہتر بنانے کی
ضرورت پر زور دیا۔ پنجاب یونیورسٹی میں تقریب سے خطاب کرتے ہوئے منموہن سنگھ نے کہا کہ ہندوستانی انتخابی نظام مختلف چیلنجوں سے گزرکر ہمکنار ہوا ہے۔انہوں نے کہا کہ آج عوام کا جمہوری حکومت کے انتخابی نظام پر اعتماد کمزور ہوتا جارہا ہے۔ سیاسی پارٹیوں اور مفاد پرست عناصر کے ٹولے جمہوری اداروں پر قابض ہورہے ہیں۔طاقت اور دولت کے بَل پر انتخابات لڑنے والوں سے پاک الیکشن سسٹم کو قائم رکھنا اورہندوستان کے جمہوری نظام کو بچائے رکھنا انتہائی ضروری ہے۔
