لاہور(مانیٹرنگ ڈیسک) وزارت مذہبی امور کی جانب سے رواں سال حج درخواستوں کی وصولی کا آغاز15 جنوری سے ہوگا،درخواستوں کی وصولی کے لئے بینکوں کی تعداد 10سے بڑھا کر 13 کردی گئی۔تفصیلات کے مطابق رواں سال حج درخواستوں کی وصولی15جنوری سے شروع ہو گی اور خواہشمند حضرات 24 جنوری تک حج درخواستیں جمع کرا سکیں گے۔ درخواستوں کی وصولی کے لئے بینکوں کی تعداد میں اضافہ کر دیا گیا ہے۔ مجموعی طور پر 13بینک درخواستیں وصول کر سکیں
گے۔ حج درخواست کیساتھ شناختی کارڈ اور پاسپورٹ کی کاپی لگانا ضروری ہے۔اس حوالے سے ڈائریکٹر حج سعید احمد ملک نے کہا کہ قرعہ اندازی کے بعد بینکوں میں پاسپورٹ جمع ہوں گے اور صرف کامیاب عازمین بینکوں میں پاسپورٹ جمع کرائیں گے۔ شہری نیشنل بینک،یونائیٹڈ بینک،حبیب بینک ،مسلم کمرشل بینک، الائیڈ بینک،زرعی ترقیاتی بینک، بینک الفلاح،میزان بینک، بینک آف پنجاب،حبیب میٹروپولیٹن بینک،عسکری بینک دبئی اسلامک بینک اور فیصل بینک میں درخواستیں جمع کراسکیں گے۔
