لاہور ( این این آئی) سنی اتحاد کونسل پاکستان کے چیئرمین صاحبزادہ حامد رضا نے کہا ہے کہ سنی جماعتوں کے تمام سربراہ گوجرانوالہ کی ختم نبوت کانفرنس میں شریک ہوں گے، پانچ سو سے زائد گدی نشیں مشائخ نے بھی 24 دسمبر کی
ختم نبوت کانفرنس میں شرکت کا اعلان کر دیا ہے،گوجرانوالہ کی تاریخی کانفرنس فیصلہ کن ثابت ہو گی، ممبران اسمبلی کی بڑی تعداد استعفے دینے کے لئےپیر سیال شریف کے ساتھ رابطے میں ہے، اب خواجہ حمید الدین سیالوی سے نواز شریف کی ممکنہ ملاقات بے معنی ہے۔ ان خیالات کا اظہار انہوں نے 24 دسمبر کو شیرانوالہ باغ گوجرانوالہ میں ہونے والی ختم نبوت کانفرنس کی رابطہ مہم کے دوران ڈاکٹر ابو الخیر زبیر، ڈاکٹر اشرف آصف جلالی، صاحبزادہ حامد سعید کاظمی، صاحبزادہ رفیق احمد مجددی، پیر عظمت علی شاہ، علامہ عبدالعزیز چشتی اور دوسرے علماء و مشائخ سے ملاقاتوں کے دوران گفتگو کرتے ہوئے کیا۔ چیئرمین سنی اتحاد کونسل نے کہا کہ نواز شریف دولت بچانے کے لئے تصادم کی سیاست کر رہے ہیں۔ سابق نااہل وزیراعظم کی عدلیہ مخالف تحریک سے ادارے اور ملک کمزور ہو گا۔ جہانگیر ترین نے اپنے خلاف عدالتی فیصلے کے بعد سیاسی عہدہ چھوڑ کر قابل تقلید مثال قائم کی ہے۔ صاحبزادہ حامد رضا کا آرمی چیف کا سکیورٹی صورت حال پر سینٹ کو بریفنگ دینا صحت مند روایت ہے۔
