نئی دہلی (این این آئی)بھارت میں فلسطینی سفیر نے کہا ہے کہ وزیر اعظم نریندر مودی جلد ہی فلسطین کا دورہ کریں گے۔غیرملکی خبررساں ادارے کے مطابق بھارت میں فلسطین کے سفیر عدنان ابوالہیجہ نے امریکی صدر
ڈونلڈ ٹرمپ کے متنازعہ فیصلے کے بعد بھارتی پارلیمان کے ایوان بالاکے ٹی وی چینل پر ایک مباحثے کے دوران یہ اعلان کیا کہ وزیر اعظم نریندر مودی جلد ہی فلسطین کا دورہ کریں گے۔ ان کا کہنا تھاکہ میں یہاں یہ اعلان کرتا ہوں اور آپ سے پہلے کوئی نہیں جانتا تھاکہ مودی فلسطین کے دورے پر جانے والے ہیں۔ انہوں نے تاہم یہ نہیں بتایا کہ وزیر اعظم کا یہ دورہ کب ہوگا۔ ان کا مزید کہنا تھا کہ بھارت ہمیشہ فلسطین کے کاز کا حامی رہا ہے۔تاہم بھارتی وزارت خارجہ کے ایک اہلکار نے اپنا نام ظاہر نہ کرنے کی شرط پر کہاکہ ہمیں وزیر اعظم کے کسی دورے کے منصوبے کے بارے میں کوئی علم نہیں ہے اور فلسطینی سفیر کے بیان پر ہماری طرف سے کوئی تبصرہ کرنا فی الوقت مناسب نہیں ہوگا۔ وزیر اعظم نریندر مودی نے اس سال جولائی میں اسرائیل کا دورہ کیا تھا۔ وہ اسرائیل جانے والے پہلے بھارتی وزیر اعظم تھے۔ تاہم وہ اسرائیل کا دورہ کرنے والے بھارتی رہنماوں کے برعکس فلسطین نہیں گئے تھے۔ اسرائیل کے وزیر اعظم بینجمن نتین یاہو اگلے ماہ بھارت آنے والے ہیں۔
