اسلام آباد(سی پی پی )پاکستان تحریک انصاف کے چیئرمین عمران خان نے کہا ہے کہ سندھ کو زرداری اور اسکے کرپٹ چیلوں کے چنگل سے آزاد کرائیں گے ، نواز کوکٹہرے میں لے آئے اب زرداری کی باری ہے،کرپشن کے امام زرداری کا تعاقب کریں گے،اگلے ہفتے کراچی آرہا ہوں اور تبدیلی لائے بغیر چین سے نہیں بیٹھوں گا۔ان خیالات کا اظہار انہوں نے تحریک انصاف سندھ کے مرکزی سینئر نائب صدر علی زیدی سے ملاقات کے
دوران کی ۔ملاقات میں علی زیدی کی جانب سے سندھ خصوصا کراچی کے عوام کو درپیش بنیادی مسائل پربریفنگ دی گئی۔ملاقات کے دوران عمران خان نے کہا کہ اگلے ہفتے کراچی آرہا ہوں، عوام سے مل کرزرداری اورٹولے کے مستقبل کا فیصلہ کریں گے، سندھ میں پیپلزپارٹی کی حیوانیت کی حد تک لوٹ کھسوٹ ناقابل قبول اورناقابل برداشت ہے، تحریک انصاف سندھ کوزرداری اوراسکے کرپٹ چیلوں کے چنگل سے چھڑوائے گی، نوازکو کٹہرے میں لے آئے اب زرداری کی باری ہے، سندھ پرخصوصی نظرہے، تبدیلی لائے بغیر چین سے نہیں بیٹھیں گے اورپاکستان اور سندھ کے وجود کو کرپشن سے پاک کرنے کیلئے کرپشن کے امام کا تعاقب کریں گے۔اس موقع پر رہنما تحریک انصاف علی زیدی نے کہا کہ سندھ پیپلز پارٹی کی بدترین انتظامی کارکردگی کی بھینٹ چڑھ رہا ہے، سندھ کے ظالم حکمران عوام سے پینے کے صاف پانی جیسا بنیادی حق بھی ہتھیا چکے ہیں، روٹی، کپڑا، مکان اور جئے مہاجرجیسے کھوکھلے نعرے لگا کر سندھ کے عوام کی رگوں میں زہر اتارا جا رہا ہے، محنتی، مخلص اور محب وطن سندھی عوام پر بدترین اور کرپٹ ترین ٹولہ مسلط ہے اسلیے شہری اور دیہی سندھ کی امیدوں کا واحد مرکز تبدیلی کا پیغام ہے۔
