کراچی (سی پی پی )سندھ ہائیکورٹ نے21دسمبر تک لیاری ایکسپریس وے کا کام مکمل کرنے کا حکم دیتے ہوئے کہا ہے کہ ایکسپریس وے یکم جنوری تک نہ کھولا گیا تو کارروائی کرینگے۔تفصیلات کے مطابق سندھ ہائیکورٹ میں لیاری ایکسپریس وے منصوبے کے متاثرین کو معاوضہ دینے سے متعلق کیس کی سماعت کی،جسٹس عرفان نے ریمارکس دیتے ہوئے کہا کہ لیاری ایکسپریس وے یکم جنوری تک نہ کھولا گیا تو کارروائی کریں گے ،انہوں نے کہا کہ منصوبے کو 2003 میں 3 ارب روپے سے مکمل ہوناتھا

اب لاگت 23 ارب ہو چکی ہے، منصوبہ وقت پر مکمل ہوتاتو اب منافع میں چل رہا ہوتا۔جسٹس عرفان نے کہا کہ سندھ حکومت کا کوئی بھی منصوبہ مقررہ وقت میں مکمل نہیں ہوتا،اگر منصوبے بروقت مکمل نہ ہوئے تو معاملہ نیب کو بھیج دیں گے، جسٹس عرفان نے کہا کہ وزیراعلی سندھ نے اگست میں منصوبہ مکمل کرنے کا کہا تھا،میں روز اس روڈ سے آتا ہوں کہیں کام نہیں ہو رہا ،عدالت نے مقدمے کی مزید سماعت یکم جنوری تک ملتوی کر دی۔