لاہور(مانیٹرنگ ڈیسک) سابق وزیر اعظم محمد نواز شریف کا لندن میں زیر علاج اپنی اہلیہ بیگم کلثوم نواز کی تیمارداری کیلئے  منگل کے روز لندن روانگی کا امکان ہے ۔ نواز شریف کی اہلیہ بیگم کلثوم نواز کا لندن میں کینسر کا علاج جاری ہے اور انکے صاحبزادے اور خاندان کے دیگر افراد ان کے پاس موجود ہیں۔سابق وزیراعظم محمد نوازشریف کی زیر صدارت مسلم لیگ (ن)کی نئی سینٹرل ایگزیکٹو کمیٹی کا پہلا اجلاس  پیر کے روز اسلام آباد میں ہوگا

جس میں درپیش چیلنجز اور سیاسی صورت حال سے نمٹنے کیساتھ پارٹی کے مستقبل اور تنظیمی امور پر مشاورت کی جائے گی۔ذرائع کے مطابق مسلم لیگ (ن)کی سنٹرل ایگزیکٹو کمیٹی کے تمام ارکان کو اجلاس میں شرکت کے دعوت نامے جاری کر دئیے گئے ہیں۔اجلاس میں وزیراعظم شاہد خاقان عباسی، وزیراعلی پنجاب شہباز شریف، مریم نواز اور حمزہ شہباز بھی شریک ہوں گے۔ اجلاس میں وزیراعظم آزاد کشمیر، وزیراعلی بلوچستان، وزیراعلی گلگت بلتستان، وفاقی وزیر داخلہ احسن اقبال، چوہدری نثار، رانا ثنااللہ بھی موجود ہوں گے۔ اسحاق ڈار سنٹرل ایگزیکٹو کمیٹی کا حصہ ہونے کے باوجود اجلاس میں شرکت نہیں کرسکیں گے۔ اجلاس میں مسلم لیگ (ن)کے مستقبل کے سیاسی سفر اور تنظیمی امور پر مشاورت کی جائے گی۔27رکنی سنٹرل ایگزیکٹو کمیٹی میں راجہ ظفر الحق، شاہد خاقان عباسی ، محمد شہباز شریف،چوہدری نثار علی خان، خواجہ محمد آصف، محمد اسحاق ڈار، ایاز صادق، احسن اقبال، خواجہ سعد رفیق، سردار ثنا اللہ زہری،راجہ فاروق حید، حافظ حفیظ الرحمن،چوہدری برجیس طاہر،پرویز رشید،سردار مہتاب احمد خان، بیگم عشرت اشرف، مشاہد اللہ خان، امیر مقام بابوسرفراز خان جتوئی، اسد خان جونیجو، عرفان صدیقی،رانا ثنا اللہ خان، چوہدری شیر علی، حمزہ شہباز شریف،مریم نواز شریف،ڈاکٹر آصف کرمانی اور مریم اورنگزیب شامل ہیں۔