کراچی (مانیٹرنگ ڈیسک) ایم کیوایم پاکستان اور پاک سرزمین پارٹی کے درمیان طے پانے والی شرائط کی مبینہ تحریری معاہدے کی کاپی سامنے آ گئی ۔تفصیلات کے مطابق دونوں پارٹیوں کے درمیان ملاقات میں طے پائے گئے تحریری معاہدے میں درج ہے کہ صوبے اور شہر کے وسیع تر مفاد میں اور مینڈیٹ کو تقسیم ہونے سے بچانے کے لیے عدم تصادم اور عدم تشدد کی پالیسی پر عمل پیرا ہوتے ہوئے متحد ہونے کا فیصلہ کیا ہے ، دونوں جانب کی قیادت اس شہر اور صوبے کی تعمیر و ترقی کے
لیے انشا اللہ اگلے انتخابات میں ایک نشان ، ایک نام اور ایک منشور پر حصہ لیں گے ، تحریر میں درج ہے کہ تمام کارکنان کو بھی یہ تلقین کرتے ہیں کہ مل جل کر اس مشترکہ و مثبت کوشش کو عملی جامہ پہنانے کے لیے اپنا کردار ادا کریں ، آئندہ کا لائحہ عمل باہمی مشاورت کے بعد طے کرکے میڈیا اور عوام کو آگاہ کیا جائے گا ۔معاہدے کے نکات میں مہاجر قومی موومنٹ اور مہاجر اتحاد کا کہیں ذکر نہیں ہے۔ مبینہ تحریری معاہدے کی کاپی پر کسی کے دستخط ہیں اور نہ ہی کسی رہنما کا نام درج ہے۔
