لاہور (مانیٹرنگ ڈیسک) پاکستان پیپلز پارٹی نے کہا ہے کہ پیپلز پارٹی نے کبھی کسی کے ایجنڈے پر کام نہیں کیا،آصف زرداری جو لڈو مسلم لیگ (ن) کو کھلاتے تھے وہ دوکان بند ہوگئی ،مسلم لیگ (ن) کی تاریخ آمروں کی خدمت گزاری سے بھری پڑی ہے جبکہ پیپلز پارٹی ہمیشہ آئین اور جمہوریت کے ساتھ کھڑی ہوئی۔پیپلز پارٹی کے مرکزی سیکرٹری اطلاعات چوہدری منظور نے وفاقی وزیر خواجہ سعد رفیق کے بیان پر اپنے ردعمل کا اظہار کرتے ہوئے کہا کہ پیپلز پارٹی نے کبھی کسی کے ایجنڈے پر کام نہیں کیا البتہ مسلم لیگ (ن) کی تاریخ کسی کے ایجنڈے پر کام کرنے سے بھری پڑی ہے۔

نواز شریف بار بار کسی کے ایجنڈے پر خدمات سرانجام دیتے آرہے ہیں۔ جب نواز شریف کالا کوٹ پہن کر سپریم کورٹ گئے تھے تب وہ کسی کے ایجنڈے پر عمل پیرا تھے،نوازشریف نے جب آصف زرداری سے ملاقات سے انکار کیاتھا سعد رفیق بتائیں نواز شریف اسوقت کس کے ایجنڈے پر عمل پیرا تھے ۔ انہوں نے کہا کہ پیپلز پارٹی نے ہمیشہ عوام کے ایجنڈے پر کام کیا ہے اور ہمیشہ آئین اور جمہوریت کے ساتھ کھڑی ہوئی۔ جبکہ مسلم لیگ (ن) کی تاریخ آمروں کی خدمت گزاری سے بھری پڑی ہے ۔ انہوں نے کہا کہ پیپلز پارٹی جمہوری قوت ہے اور ہمیشہ جمہوری ایجنڈے پر چلتی ہے ۔