اسلام آباد (مانیٹرنگ ڈیسک) سوزوکی کمپنی نے اپنی سستی گاڑی متعارف کرا دی ہے، تفصیلات کے مطابق پاکستان میں سب سے زیادہ فروخت ہونے والی سوزوکی کمپنی کی ہی گاڑیاں ہیں۔ اب سوزوکی کمپنی نے اپنی گاڑی سیلیریو کا اپ ڈیٹ ورژن متعارف کرایا ہے جو کہ ایک سستی گاڑی ہے۔

اور یہ سستی ترین گاڑی سوزوکی کمپنی نے بھارت میں متعارف کرائی ہے جس کی فروخت اس ماہ کے آخر تک بھارت میں شروع ہو جائے گی۔ اس کی قیمت پاکستان کے لحاظ سے کم ہے، اس گاڑی کا ڈیزائن اور ٹیکنالوجی دونوں ہی بہتر کی گئی ہیں، یہ سیلیریو ایل ایکس آئی، وی ایکس آئی اور زی ایکس آئی کے ساتھ 12 ورژن میں دستیاب ہو گی اور اس کی بھارت میں ابتدائی قیمت 4 لاکھ 15 ہزار بھارتی روپے ہو گی جو کہ پاکستانی روپوں میں چھ لاکھ 68 ہزار بنتی ہے۔ سوزوکی کمپنی نے اس گاڑی میں جدید ترین حفاظتی فیچرز رکھے ہیں، اس گاڑی کا ڈیزائن پہلے کی نسبت زیادہ اچھا ہے، یہ گاڑی پاکستان میں موجود سوزوکی مہران سے ڈیزائن میں بہت بہتر ہے۔ یہ گاڑی 998 سی سی کی ہے اور اس میں تھری سلینڈر K10B پٹرول انجن ہے جو کہ 67 ہارس پاور رکھتا ہے۔ سوزوکی کی بہت سی ایسی گاڑیاں ہیں جو پاکستان میں نہیں آئی ہیں بلکہ پاکستانیوں نے انہیں بیرون ملک سے خود ہی منگوایا ہے اب دیکھنا یہ ہے کہ کیا سوزوکی کمپنی اس گاڑی کو پاکستان میں بھی لانچ کرے گی یا نہیں۔ اگر یہ گاڑی پاکستان میں لانچ ہو جاتی ہے تو یہ پاکستانیوں کے لیے ایک اچھی گاڑی ثابت ہو گی مگر یہاں آ کر اس کی قیمت کیا ہوتی ہے یہ تو اس کی پاکستان آمد کے بعد ہی پتہ چلے گا۔