اسلام آباد (این این آئی)وفاقی وزیر خزانہ اسحاق ڈار کی زیر صدارت اجلاس میں نان فائلرز کے لئے بینک ٹرانزیکشن پر ودہولڈنگ ٹیکس کی کم کی گئی شرح 0.4 فیصد کے اطلاق کی مدت 30 ستمبر 2017ء سے 31 دسمبر 2017ء تک بڑھانے کا فیصلہ کیا گیا۔وفاقی وزیر خزانہ و ریونیو اسحق ڈار کی زیر صدارت ملک میں ریونیو وصولی، گوشوارے جمع کرانے اور اس حوالے سے آگاہی مہم پر پیش رفت کی صورتحال کا جائزہ لینے کیلئے اجلاس منعقد ہوا۔
فیڈرل بورڈ آف ریونیو (ایف بی آر) کے چیئرمین، سینئر ممبرز کے علاوہ وزارت خزانہ کے حکام بھی اس موقع پر موجود تھے۔ چیئرمین ایف بی آر نے وفاقی وزیر کو رواں مالی سال کی پہلی سہ ماہی جولائی تا ستمبر کے دوران ریونیو وصولی کے بارے میں بریفنگ دی۔ انہوں نے بتایا کہ ایف بی آر رواں مالی سال کے لئے ٹیکس وصولی کے ہدف کو حاصل کرنے کے راستے پر گامزن ہے۔ وزیر خزانہ نے ریونیو وصولی سے متعلق ایف بی آر کی کوششوں کو سراہا۔ چیئرمین ایف بی آر نے وزیر خزانہ کو ٹیکس دہندگان کے لئے آگاہی مہم کے بارے میں بھی آگاہ کیا۔ انہوں نے کہا کہ اس مہم کے نتائج آنا شروع ہو گئے ہیں جو گوشوارے جمع کرانے والوں کی تعداد میں اضافے سے ظاہر ہوتے ہیں۔ انہوں نے کہا کہ 28 ستمبر 2017ء تک جمع کرائے گئے گوشواروں کی تعداد ایک لاکھ 78 ہزار 995 تک بڑھ گئی ہے جو ستمبر 2016ء میں 54 ہزار 86 تھی۔ اجلاس میں نان فائلرز کے لئے بینک ٹرانزیکشن پر ودہولڈنگ ٹیکس کی کم کی گئی شرح 0.4 فیصد کے اطلاق کی مدت 30 ستمبر 2017ء سے 31 دسمبر 2017ء تک بڑھانے کا فیصلہ کیا گیا۔ وزیر خزانہ نے اس حوالے سے ضابطہ کی کارروائی مکمل کرنے کی ہدایت کی۔
