اسلام آباد (نیوز ڈیسک) سری لنکا کے کرکٹ بورڈ نے اپنی ٹیم کو پاکستان بھیجنے پر آمادگی ظاہر کی ہے اورسری لنکن ٹیم امسال نومبر یا دسمبر میں پاکستان کا دورہ کرے گی۔پی سی بی ذرائع کے مطابق سری لنکن بورڈ نے امن و امان کی صورتحال میں بہتری کی وجہ سے اپنی ٹیم کو پاکستان بھیجنے پر آمادگی ظاہر کی ہے اور آئی لینڈرز میزبان گرین شرٹس کے ساتھ لاہور میں ون ڈے اور ٹی ٹوئنٹی میچز کھیلیں گے۔
پی سی بی حکام کا کہنا ہے کہ پاکستان سپر لیگ فائنل کے لاہور میں کامیاب انعقاد سے ثابت ہو چکا کہ پاکستان علامی ایونٹس کے انعقاد کے لیے سازگار ہے اور یہاں پر کسی قسم کے سیکیورٹی مسائل نہیں ہیں جب کہ سری لنکن بورڈ کی جانب سے فیصلہ پاکستان میں انٹرنیشنل کرکٹ کی بحالی میں مددگار ثابت ہوگا۔ حکام کے مطابق سری لنکن دورے کے علاوہ ستمبر میں ورلڈ الیون بھی پاکستان کا دورہ کرے گی جس میں آسٹریلیا، ویسٹ انڈیز، سری لنکا اور جنوبی افریقہ کے پلیئرز شامل ہوں گے۔یاد رہے کہ اس سے قبل زمبابوے کی ٹیم نے پاکستان کا دورہ کیا تھا جبکہ رواں سال لاہور میں کھیلے گئے پی ایس ایل فائنل میں کئی غیرملکی کرکٹرز بھی پاکستان میں ایکشن میں دکھائی دیے واضح رہے کہ 3 مارچ 2009 میں لاہور میں سری لنکن ٹیم پر دہشتگرد حملے کے بعد غیرملکی ٹیمیں پاکستان آنے سے انکار کر چکی ہیں۔
