اسلام آباد (مانیٹرنگ ڈیسک) بھارت سے پہلا میچ ہارنے کے بعد ٹیم میٹنگ میں شعیب ملک کی جذباتی تقریر نے تمام کھلاڑیوں میں نئی روح پھونک دی تھی، پاکستانی ٹیم کے اوپننگ بلے باز اور آئی سی سی چیمپینز ٹرافی کے ہیرو فخر زمان نےجیت کا کریڈٹ شعیب ملک کو دیدیا،
میڈیا سے گفتگو۔ تفصیلات کے مطابق پاکستانی ٹیم کے اوپننگ بلے باز اور آئی سی سی چیمپینز ٹرافی کے ہیرو فخر زمان نے برطانیہ سے مردان اپنے گھر پہنچنے پر میڈیا سے گفتگو کرتے ہوئے بتایا کہ جب بھارت سے پہلے میچ میں شکست کھا کر ہوٹل واپس پہنچے تو ٹیم مینجمنٹ ، کوچ اور کھلاڑیوں کی ایک طویل میٹنگ ہوئی جس میں شعیب ملک نے نہایت جذباتی تقریر کی جس نے ہماری ٹیم میں ایک نئی روح پھونک دی ۔ اس میٹنگ میں سینئر کھلاڑیوں، کپتان اور کوچ نے فیصلہ کیا کہ ہم اب پورا ٹورنامنٹ ہی الگ طریقے سے کھیلیں گے۔واضح رہے کہ شعیب ملک چیمپئنز ٹرافی میں اپنی انفرادی کارکردگی سے تو متاثر نہ کر سکے تاہم فخر زمان کے انکشاف کے بعد پاکستانی قوم شعیب ملک کی شکر گزار ہے کہ انہوں نے اس نازک موقع پر سینئر ہونے کا حق ادا کرتے ہوئے ٹیم کے نیا حوصلہ دیا اور جونئیر کھلاڑیوں کو فائٹ بیک کرنے کا حوصلہ دیا۔
