اسلام آباد(مانیٹرنگ ڈیسک)عامر نے غلطی کا ازالہ کر دیا، برطانیہ میں کھوئی عزت وہیں سے دوبارہ کما لی۔ تفصیلات کے مطابق قومی ٹیم کے مایہ ناز فاسٹ بائولر محمد عامر نے اپنی غلطی کا ازالہ کرتے ہوئے نہ صرف پاکستانیوں کے دل جیت لئے بلکہ وہ نوجوانوں کیلئے
ایک عمدہ مثال بنا کر بھی ابھرے ہیں۔ یہ انگلستان کی ہی سرزمین تھی جہاں عامر نے دولت کی خاطر رسوائی کما ئی ، ملک سے غداری پر عامر پوری قوم کی نظروں سے گر گئے تھے ۔ غلط طریقے کے انجام سامنے آنے پر عامر نے اللہ کے حضور توبہ کر کے قوم سے معافی مانگی اور سزا پوری ہونے کے بعد واپس میدان میں آگیا۔ سات سال قبل جس شہر نے عامر کو رسوائی کی دلدل میں دھکیل دیا تھا اسی شہر میں عامر کی سچے دل سے توبہ اور پاکستان سے وفا کی اٹھائی دوبارہ قسم نے اس پر انعامات کی بارش کر دی۔عامر نے اپنے طرز عمل سے ثابت کیا کہ گر کر اٹھنے والا ہی اصل کھلاڑی ہے۔ واضح رہے کہ چیمپئنز ٹرافی کے فائنل میں بھارتی بلے بازوں کیلئے محمد عامر ایک ڈرائونا خواب بن کرسامنے آئے اور اپنے پہلے سپیل کے ابتدائی اوورز میں ہی چیمپئنز ٹرافی کی فتح پاکستانی کی جھولی میں ڈال کر شاید دل میں یہ کہا ہو کہ ’’جو قرض رکھتے تھے جان پر وہ حساب آج چکا دیا‘‘۔
