اسلام آباد(مانیٹرنگ ڈیسک)اسامہ بن لادن نے بینظیر بھٹو کے خلاف نواز شریف کو 50ملین ڈالر پنجاب ہائوس راولپنڈی میں بھجوائے، القاعدہ کے جنگجو گاڑیوں میں بیگ بھر کر لائے جو میں نے اندر جاتے ہوئے خود دیکھے، نواز شریف پاکستان ٹوٹنے کا موجب بن سکتے ہیں وہ پنجاب پولیس کی طرح پاک فوج کو بھی اپنا اسی طرح تابعدار دیکھنا چاہتے ہیں،
نواز شریف کے مزاج میں انتقام بہت زیادہ ہے۔ ذوالفقار علی بھٹو نے پاکستان کے دفاع اور فوج کی تشکیل نو میں اہم کردار ادا کیا۔نواز شریف کے سابق مشیر خاص ٹکا محمد اقبال خان کا نجی ٹی وی کو انٹرویو ۔ تفصیلات کے مطابق وزیراعظم نواز شریف کے قریبی ساتھی اور سابق مشیر خاص ٹکا محمد اقبال خان نے نجی ٹی وی کو انٹرویو دیتے ہوئے کہا ہے کہ نواز شریف کے القاعدہ کے سربراہ اسامہ بن لادن سے خـصوصی مراسم تھے وہ ان سے ملاقاتیں کیا کرتے تھے۔ اسامہ بن لادن عورت کی حکمرانی کے خلاف تھے جس کیلئے انہوں نے بینظیر بھٹو کے خلاف نواز شریف کو 50ملین ڈالر کی خطیر رقم دی ۔ یہ رقم بیگوں میں رکھ کر القاعدہ جنگجوئوں کی نگرانی میں گاڑیوں کے ایک قافلے کی شکل میں پنجاب ہائوس راولپنڈی میں پہنچائی گئی ۔ ان کا کہنا تھا کہ بیگوں کو میں نے خود اندر جاتے ہوئے دیکھا اور اس موقع پر پنجاب ہائوس کو القاعدہ جنگجوئوں نے اپنے گھیرے میں لے رکھا تھا۔ ٹکا محمد اقبال خان کا کہنا تھا کہ ایک بار نواز شریف نے مجھ سے کہا تھا کہ میری زندگی ختم ہو سکتی ہے پر میں بھٹو خاندان کے ساتھ اپنے تعلقات اچھے نہیں کر سکتا۔ انہوں نے ہمیں برباد کیا اور ہماری مل چھین لی۔ ان کا کہنا تھا کہ میثاق جمہوریت کے باوجود نواز شریف بینـظیر بھـٹو کے مخالف ہی رہے۔ وزیراعظم نواز شریف کے سابق مشیر خاص
کا کہنا تھا کہ نواز شریف ٹکرائو کو پسند کرتے ہیں وہ پنجاب پولیس کی طرح پاک فوج کو بھی اسی طرح اپنا تابعدار دیکھنا چاہتے ہیں۔ نواز شریف احسان فراموش ہیں وہ ضیا الحق کی برسی پر کبھی ان کے اہلخانہ سے ملنے نہیں گئے جبکہ ضیا الحق نواز شریف کیلئے دعا کیا کرتے تھے کہ آپ کو میری زندگی بھی لگ جائے ۔ انہوں نے اس تاثر کو غلط قرار دیتے ہوئے کہا کہ
ضیا الحق اور فوج نواز شریف کے بجائے شہباز شریف کو آگے لانا چاہتی تھی ان کا کہنا تھا کہ نواز شریف ہی اس وقت فوج کے فیورٹ تھے ۔ ٹکا محمد اقبال خان کا کہنا تھا کہ میں نے کہا تھا کہ نواز شریف اپنی سادگی کی وجہ سے پاکستان ٹوٹنے کا موجب بن سکتے ہیں۔ ان کی پنجاب کو دی جانیوالی خصوصی اہمیت ملک کو توڑ سکتی ہے جس کا ثبوت پی ٹی آئی کی جانب سے
اسلام آباد کو لاک ڈائون کرنے کے اعلان کے بعد وزیراعلیٰ خیبرپختونخواہ پرویز خٹک کی اسلام آباد آنے کی کوشش کو ناکام بنانا تھا وہ تو شکر ہے پٹھانوں نے ردعمل نہیں دیا ورنہ کچھ بھی ہو سکتا تھا۔ ان کا کہنا تھا کہ نواز شریف سیاست سے جس طرح پیسہ بناتے ہیں اسی طرح سیاست میں پیسہ خرچ بھی کرتے ہیں وہ اپنے قریبی ساتھیوں کو بہت خیال رکھتے ہیں۔نواز شریف
چھوٹا کام نہیں کرتے ان کے کام ایسے ہوتے ہیں جو عام آدمی کی سمجھ سے بالاتر ہوتے ہیں۔انہوں نے کہا کہ پاکستان کو دفاعی لحاظ سے مضبوط کرنے میں ذوالفقار علی بھٹو نے کلیدی کردار اداکیا۔ اس وقت پاک فوج کی ایک کور ہوا کرتی تھی ذوالفقار علی بھٹو نے پاک فوج کی 9کوریں بنوائیں اور فوج کی تشکیل نو کی۔ پانامہ کیس کے حوالے سے ان کا کہنا تھا کہ کیس سپریم کورٹ میں ہے
جس پر ابھی بات کرنا مناسب نہیں تاہم جے آئی ٹی کے حوالے سے انہوں نے اظہار خیال کرتے ہوئے کہا کہ جے آئی ٹی کو حسن اور حسین نواز کو اتنی بات نہیں بلانا چاہئے تھا بلکہ ملزمان کو ایک ایک بار بلایا جاتا اور تفتیش کی جاتی اور وقت مقررہ پر اپنی تفتیشی رپورٹ سپریم کورٹ کے حوالے کر دی جاتی۔ انہوں نے کہا کہ نواز شریف ہی دراصل مسلم لیگ ن ہیں اور انہیں
اگر کسی قسم کی زک پہنچی تو ن لیگ ختم ہو جائے گی۔ نواز شریف چاہیں اسمبلی توڑ کر الیکشن کااعلان کر دیں یا سپریم کورٹ کے فیصلے کے بعد اسمبلی کو چلنے دیں دونوں صورتوں میں انہیں نقصان پہنچنے کا اندیشہ ہے۔ بینظیر بھٹو کے حوالے سے پوچھے گئے ایک سوال کا جواب دیتے ہوئے ٹکا محمد اقبال خان کا کہنا تھا کہ بینـظیر بھٹو کے قتل میں پاکستان میں کئی طاقتیں ملوث ہیں
جن میں ایسے لوگ بھی ہو سکتے ہیں جو بھـٹو خاندان کو پسند نہیں کرتے یا بھـٹو خاندان سے انہیں کبھی نقـصان پہنچا ہو۔ آصف زرداری کو مشورہ دیتے ہوئے ان کا کہنا تھا کہ بلاول آنیوالا وقت کا لیڈر ہے اسے آزادانہ سیاست کرنے دی جائے ۔ اس کے مقابلے میں پاکستان میں کوئی اور لیڈر نہیں ، بینظیر کی بہن اور بلاول کی خالہ صنم بھٹو کو بلاول کی معاونت کیلئے لندن سے بلایا جائے
اور لاہور میں جلسے کا اعلان کیا جائے ، مجھے یقین ہے کہ بلاول بازی مار لے گا، وہ ڈربی کا وہ گھوڑا ہے جو اکیلا بازی جیت سکتا ہے۔
