اسلام آباد ( مانیٹرنگ ڈیسک) وفاقی اداروں نے روش نہ بدلی تو ان کا بوریا بستر گول کر دیا جائے گا ،فاروق ستار کو گرفتار نہیں کیا گیا،وزیر اعلی ٰ سندھ سیدمراد علی شاہ شرجیل میمن کے خلاف اقدام پر برہم ، وفاقی اداروں کو کھری کھری سنا دیں۔تفصیلات کے مطابق خیرپور میں میڈیا سے گفتگو کے دوران وزیر اعلیٰ سندھ مراد علی شاہ کا کہنا تھا کہ سابق صوبائی وزیرشرجیل میمن ضمانت پر ہیں،
عدالت سے جو حکم ملا ہے اس پر عمل کریں گے، کسی اور نے کچھ کیا تو جواب دیں گے۔ انہوں نے وارننگ دیتے ہوئے کہا کہ وفاقی اداروں نے روش نہ بدلی تو ان کا بوریا بستر گول کر دیا جائے گا۔ وزیر اعلیٰ سندھ نے کہا کہ شرجیل میمن آج عدالت میں پیش ہوں گے اور عدالت جو بھی فیصلہ دے گی، اس کا احترام کیا جائے گا۔فاروق ستار کے حوالے سے ان کا کہنا تھا کہ فاروق ستار کچھ کیسز میں عدالت کو مطلوب ہیں جن میں عدالت نے ان کے ناقابل ضمانت وارنٹ گرفتاری جاری کر رکھے ہیں۔ فاروق ستار کو گرفتار نہیں کیا گیا بلکہ کئی ایسے کیسز بھی ہیں جس میں انہوں نے ضمانت نہیں کرائی۔
