نئی دہلی(مانیٹرنگ ڈیسک)بھارتی فوج کا مکروہ چہرہ بے نقاب کرنے اور کرپشن کا بھانڈہ پھوڑنے والے سپاہی تیج بہادر کے خلاف بارڈر سیکیورٹی فورسز (بی ایس ایف )بھی میدان میں آگئی ۔
تفصیلات کے مطابق بھارتی بارڈر سیکورٹی فورسز نے اپنے ہی سپاہی کو شرابی اور عادی مجرم قرار دیدیا۔نجی ٹی وی چینل کے مطابق دو روز قبل سوشل میڈیا پربھارتی فوجی اہلکاروں کی بدحالی کا پول کھولنے والے اہلکارکا لائن آف کنٹرول سے پونچھ ہیڈکوارٹرتبادلہ کردیا گیا ہے اور اسے سزا کے طور پر پلمبر کی ڈیوٹی پر لگادیا گیا ہے جبکہ آج اس کی اہلیہ شرمیلا نے انکشاف کیا ہے کہ تیج بہادر کو حکومت نے غائب کر دیا ہے۔
دوسری جانب بی ایس ایف نے بھی اپنے سپاہی کے خلاف کمر کس لی اور کہا ہے کہ سپاہی تیج بہادر شرابی اور عادی مجرم ہے جو کئی باربغیر اجازت ڈیوٹی سے غیر حاضر رہا۔بی ایس ایف کی جانب سے مزید کہا گیا ہے کہ وہ سینئر افسرا ن کی عزت بھی نہیں کرتا تاہم اس کے الزامات کی تحقیقات کیلئے سینئر افسران موقع پر پہنچ گئے ہیں۔
واضح رہے کہ بھارتی فوج کی سرحد پر تعینات فوجی تیج بہادر نے ایک ایسی وڈیو جاری کی تھی جس نے بھارت کو پوری دنیا میں شرمندہ کرکے رکھ دیا۔ بھارتی فوجی نے اپنی ویڈیو میں دکھ بھری کہانی سناتے ہوئے کہاکہ انہیں کھانے میں کوئی صحت مند غذا نہیں دی جاتی ،صبح کے ناشتے میں ایک جلا ہوا پراٹھا اور آدھا کپ چائے جبکہ دوپہر کے کھانے میں مصالحے اور گھی کے بغیر دال اور دو روٹیاں دی جاتیں ہیں جبکہ اکثر سپاہی رات کا کھانا کھائے بغیر ہی سو جاتے ہیں۔

موضوعات:بھارتی فوج