لاہور / کراچی /اسلام آباد (آئی این پی)اسلام آباد سمیت ملک کے مختلف حصوں میں بارش اور پہاڑوں پر برف باری سے موسم مزید سرد ہوگیا ۔ وفاقی دارالحکومت میں وقفے وقفے سے ہونے والی بارش سے موسم سرد ہو گیا جبکہ صوبائی دارالحکومت لاہور میں بھی ٹھنڈی ہواوں کے ساتھ ہلکی بارش ہوئی جس سے سردی میں اضافہ ہو گیا۔ محکمہ موسمیات نے مزید بارش کا امکان ظاہر کیا ہے۔ ملتان، وہاڑی اورگردونواح میں دھند چھائی رہی۔ حدنگاہ صفرہونے کے بعد ملتان ایئرپورٹ کو پروازوں کے لئے بند کر دیا گیا۔ کوٹلی سمیت مختلف علاقوں میں ہلکی اورتیز بارش کے بعد موسم مزید سرد ہو گیا ۔ کوئٹہ میں کڑاکے کی سردی پڑ ے لگی جہاں درجہ حرارت نقطہ انجماد سے گر گیا۔ کوئٹہ میں درجہ حرارت منفی 3 ریکارڈ کیا گیا۔ شہر میں سردی کی شدت کے باعث کاروبار زندگی بری طرح مفلوج ہوگیا۔ بیشتر علاقوں میں گیس پریشر میں کمی سے لوگوں کو مشکلات کا سامنا بھی کرنا پڑا۔ادھر بالائی علاقوں میں نان اسٹاپ برف باری سے وادی نیلم، چترال اور سوات کا حسن بڑھ گیا۔ برف باری سے لطف اندوز ہونے کیلئے سیاح پہنچ گئے ۔ اپردیر، مری، دیامیراور چترال کے پہاڑوں پر بھی برف پڑ چکی ہے جس کے بعد راستے بند اور لوگ گھروں میں محصور ہو گئے ۔ ملک کے بالائی علاقوں میں نان اسٹاپ برف باری کے بعد ہر شے پر سفیدی چھا گئی ۔ لواری ٹاپ، بن شاہی اور کو ہستان کمراٹ میں اب تک چار فٹ تک برف پڑ چکی ہے۔ چترال جا نے کے لئے سیکڑوں سیاح لواری ٹنل کے دونوں طرف ٹنل کھلنے کے انتظا ر میں رہے جبکہ کاغان، ناران، چترال، شانگلہ، سوات، کالام اور مالم جبہ پر بھی برف گرنے کا سلسلہ جاری ہے۔