میلبورن /لاہور(این این آئی)پاکستان اورآسٹریلیا کے مابین تین ٹیسٹ میچوں کی سیریز کا دوسرا ٹیسٹ کل سے میلبورن میں شروع ہوگا۔میچ پاکستان کے معیاری وقت کے مطابق4بج کر30منٹ پر شروع ہوگا۔میلبورن میں اب تک دونوں ٹیموں کے مابین9ٹیسٹ میچ کھیلے گئے جن میں آسٹریلیا نے5میچ جیتے،پاکستان نے2میچ جیتے اور2ٹیسٹ میچ ڈرا ہوئے۔میلبورن میں گزشتہ روزبھی قومی ٹیم نے بھرپورٹریننگ سیشن میں حصہ لیا۔ فاسٹ بولرسہیل خان بھی پریکٹس میں شریک ہوئے۔ قومی بلے بازوں نے نیٹس میں ماربل سلیب رکھ کربیٹنگ کی پریکٹس کی ۔کھلاڑیوں نے کیچ پکڑنے کی پریکٹس بھی کی۔
واضح رہے کہ پہلے ٹیسٹ میں آسٹریلیانے پاکستان کو39رنزسے شکست دے کرسیریزمیں 1-0سے برتری حاصل کرلی ہے پاکستان کوسیریزبرابرکرنے کے لئے دوسراٹیسٹ جیتنا ہوگا۔دوسرے ٹیسٹ سے قبل دونوں جانب سے کپتانوں نے ٹیم میں تبدیلی کا اشارہ دیاہے۔ آسٹریلین کپتان اسٹیو اسمتھ نے پاکستان کوایک خطرناک ٹیم قرار دیتے ہوئے کہا کہ حریف ٹیم کو ہرگز آسان نہیں لیا جا سکتا ۔جبکہ پاکستان کے کپتان مصباح الحق کا کہنا ہے کہ ہماری بھر پور کوشش ہے کہ آسٹریلیا کے خلاف ٹیسٹ سیریز میں کم بیک کریں۔ ٹیم کے ہر کھلاڑی کو ذمہ دار ی سے کھیلنا ہوگا آسٹریلوی ٹیم ایک مضبوط حریف ہے۔ کوشش کریں گے کہ آسٹریلیا کے خلاف بہتر کھیل پیش کریں۔
واضح رہے کہ دونوں ٹیموں کے مابین تیسرا اورآخری ٹیسٹ 3 سے 7 جنوری تک سڈنی میں کھیلا جائے گا۔معروف کرکٹ ویب سائٹ کے مطابق پاکستان کی جانب سے میدان میں اترنے والے متوقع گیارہ کھلاڑی یہ ہونگے ۔ سمیع اسلم، اظہرعلی، بابر اعظم، یونس خان،مصباح الحق(کپتان)، اسد شفیق، سرفرازاحمد(وکٹ کیپر)، وہاب ریاض، یاسر شاہ، محمد عامر اور راحت علی۔
