واشنگٹن(آن لائن)امریکہ کے نو منتخب صدر ڈونلڈ ٹرمپ نے کہا ہے کہ صدارت کا عہدہ سنھبالنے کے بعد امیگریشن، صحت عام اور ٹیکسوں کی شرح کو کم کرنا ان کی اولین ترجیحات میں شامل ہے۔ واشنگٹن میں صدر اوباما سے ملاقات کرنے کے بعد ڈونلڈ ٹرمپ نے ایوانِ نمائندگان کے سپیکر پال رائن اور سینیٹ کے قائدِ ایوان میچ میکونل سے ملاقات میں اپنے قانونی ایجنڈے پر بات کی۔کیپٹل ہل میں ہونے والی اس مختصر ملاقات میں ٹرمپ نے صدارت کا منصب سنھبالنے کے بعد اپنی ترجیحات کا ذکر کیا۔انھوں نے کہا کہ امیگریشن، ہیلتھ کیئر اور ملازمیوں کے مواقع پیدا کرنا ان کی اولین ترجیح ہیں۔رپبلکن سینیٹر پال رائن کانگریس میں اہم عہدے پر ہیں اور انتخابی مہم کے دوران انھوں نے ٹرمپ کی حمایت کرنے سے انکار کر دیا تھا۔کپٹل ہل میں ڈونلڈ ٹرمپ سے ملاقات کے بعد پال رائن نے کہا کہ ٹرمپ کو بہت شاندار کامیابی ملی ہے اور اس فتح کو امریکی عوام کی بہتری میں بدل دیا جائے گا۔پال رائن کے ساتھ میڈیا سے مختصر بات چیت میں ڈونلڈ ٹرمپ نے کہا کہ وہ امریکی عوام کے لیے شاندار اقدامات متعارف کروائیں گے۔ ٹرمپ نے کہا کہ ان کی بہت سی ترجیحات ہیں جن سے عوام خوش ہوں گے۔پال رائن سے ملاقات کے بعد میڈیا سے مختصر بات چیت میں ٹرمپ نے کہا کہ ‘ہم امیگریشن کے معاملے کو بہت سختی سے لیں گے۔ ہم سرحدوں پر نظر رکھیں گے اور ہم ہیلتھ کیئر نظام کا بھی بہت کڑی نظر سے جائزہ لیں گے۔ ہمیں ملازمت کے مواقع پیدا کرنے ہیں۔یاد رہے کہ ڈونلڈ ٹرمپ نے اپنی انتخابی مہم کے دوران صدر اوباما کے ہیلتھ کیئر کی اصلاحات ختم کرنے کا وعدہ کیا تھا۔ایسے وقت میں جب امریکی سینیٹ اور ایوانِ نمائندگان میں رپبلکن جماعت کو برتری حاصل ہے، ٹرمپ کی مہم کے دوران اوباما کے ہیلتھ کیئر کا قانون اور ایران اور مغربی دنیا کا تاریخی جوہری معاہدے کو ختم کرنا قانون طور پر ان کے لیے ناممکن نہیں ہے۔ادھر مسٹر ٹرمپ کی مہم چلانے والی ٹیم نے کہا ہے کہ وہ مسلمانوں کی امریکہ آمد روکنے اور ماحولیاتی تبدیلی کم کرنے کے لیے پیرس معاہدے کو ختم کرنے جیسے بیانات کو ویب سائٹس سے ہٹا دیں گے۔