اسلام آباد(مانیٹرنگ ڈیسک) پاک چین اقتصادری راہداری منصوبہ ملک کے لئے انتہائی اہمیت کا حامل ہے ۔ پاکستان کی اقتصادیات میں ریڑھ کی ہڈی کی حیثیت رکھنے والے پاک چین اقتصادی راہداری منصوبے کے حوالے سے عوام پر بجلیا ں گرانے کی تیاری بھی مکمل کر لی گئی ہے ۔
تفصیلات کے مطابق سی پیک منصوبے کی تعمیری لاگت میں ایک فیصد کا اضافہ کر لیا گیا ہے اور اضافی اخراجات کو منصوبے کی سیکیورٹی کے لئے استعمال کیا جائے گا۔ مگر اس سلسلے میں یہ بات نہایت اہمیت کی حامل ہے کہ اس منصوبے کی سیکیورٹی کے لئے مختص ایک فیصد اضافی رقم کا بوجھ پاکستان میں انرجی صارفین کے سر پر ڈالا جائے گا۔ اس سلسلے میں ٹیکس عام شہریوں سے وصول کیا جائے گاجس سے مہنگائی میں پسنے والی عوام کے سروں پر مزید بوجھ بھی ڈال دیا جائے گا۔
واضح رہے کہ پاکستانی حکومت کی جانب سے مختلف منصوبہ جات کا براہ راست بوجھ عوام پر ٹیکسوں کی صورت میں ڈالنا پہلی بار نہیں ہے بلکہ پاکستانی حکومت اس سلسلے میں کئی بار ایسا کر چکی ہے۔ جبکہ دوسری جانب سی پیک منصوبے سے متعلق 34 بلین ڈالر کےمنصوبہ جات کا آغاز کر دیا گیا ہے اور دیگر منصوبہ جات پر کام کا جلد آغازکر دیا جائے گا۔