برسلز(این این آئی)یورپی یونین نے اعلان کیا ہے کہ وہ ترکی میں موجود مہاجرین کو ڈیبٹ کارڈز دے گا تاکہ وہ اپنی ضروریات زندگی پوری کر سکیں۔ ای یو کو توقع ہے کہ اس سے مہاجرین یورپ آنے کی کوشش نہیں کریں گے۔میڈیارپورٹس کے مطابق اقوام متحدہ اور ترکی کے ساتھ مل کر یورپی یونین اب اگلے ماہ ایک ایسی اسکیم کا آغاز کرنے جا رہا ہے جس کے تحت ای یو ڈیبٹ کارڈز دس لاکھ کے قریب مہاجرین کو دیے جائیں گے۔ یہ مہاجرین ترکی میں قیام پذیر ہیں اور ان میں سے زیادہ تر کا تعلق شام سے ہے۔اس حوالے سے یورپی یونین کے انسانی امداد کے کمشنر کرسٹوس اسٹیلیانڈیس نے برسلز میں ایک پریس کانفرنس سے خطاب کرتے ہوئے کہاکہ وہ مہاجرین جن کو امداد کی ضرورت ہے الیکٹرونک کیش کارڈز کے مستحق ہوں گے۔ وہ ان کارڈز کے ذریعے ماہانہ کیش حاصل کر سکیں گے۔ اس طرح وہ اپنے خاندان کے لیے روٹی اور سر پہ چھت حاصل کر سکیں گے اور اپنے بچوں سے مشقت کروانے کے بجائے ان کو اسکول بھیج سکیں گے۔اسٹیلیانڈیس نے یہ نہیں بتایا کہ ایک کارڈ پر ماہانہ کتنی رقم ڈالی جائے گی۔ تاہم ان کا یہ کہنا تھا کہ اس منصوبے کی مالیت تین سو اڑتالیس ملین یورو ہے۔یورپی یونین کی کوشش ہے کہ مشرقی وسطیٰ کے جنگ زدہ علاقوں سے بہ راستہ ترکی یورپ پہنچنے کی کوشش کرنے والے مہاجرین کو ترکی ہی میں ایسی مراعات فراہم کر دی جائیں جن کے ملنے کے بعد وہ آگے کا سفر ترک کر دیں۔ رواں برس ترک حکام اور یورپی یونین کے درمیان ایک معاہدہ بھی طے پایا تھا جس کے مطابق ترکی اپنے ہاں سے مہاجرین کے جنوبی یورپی ممالک کے سفر کو روکنے کی ذمے داری اٹھائے گا۔ یہ مہاجرین بحیرہ ایجین کے راستے ترکی سے یورپ کا سفر طے کرتے ہیں