اسلام آباد (آن لائن) وزیراعظم نواز شریف نے آج (جمعہ ) وفاقی کابینہ کا اجلاس طلب کر لیا ہے۔ اجلاس میں افغان مہاجرین کی پاکستان میں مزید قیام کی توسیع سمیت 15نکاتی ایجنڈے پر غور کیا جائے گا۔ تفصیلات کے مطابق وزیراعظم نواز شریف نے وفاقی کابینہ کا اجلاس آج (جمعہ) کو وزیراعظم ہاؤس میں طلب کر لیا ہے۔ وفاقی کابینہ کے اجلاس میں 15نکاتی ایجنڈا پر غور اور منظوری دی جائے گی۔ وفاقی کابینہ اجلاس میں افغان مہاجرین کو پاکستان میں ایک سال مزید قیام میں توسیع دینے کی منظوری دی جائے گی۔ پاکستان افغانستان اور اقوام متحدہ کے درمیان ہونے والے موجودہ معاہدے کے تحت رجسٹرڈ افغان مہاجرین 31دسمبر 2016ء تک پاکستان میں رہ سکتے ہیں۔ وفاقی کابینہ رجسٹرڈ افغان مہاجرین کے قیام میں31دسمبر 2017ء تک توسیع کی منظوری دے گی۔ کابینہ دہرے ٹیکسوں کے خاتمے سے متعلق سارک معاہدے پر دستخط کی اجازت کے ساتھ ساتھ دیامیر بھاشا ڈیم کی زمین کی خریداری کے معاوضے کی بھی منظوری دے گی۔