اسلام آباد (نیوز دیسک) سولہ سال سے کم عمر کے پانچ بہن بھائیوں کی جانب سے کی جانے والی اجتماعی خودکشی کی وجہ سامنے آگئی ہے ۔
تفصیلات کےمطابق اجتماعی خودکشی کی کوشش کرنے والے پانچ بہن بھائیوںنے چوہے مار دوا پی کر خود کشی کی کوشش کی ہے جن کی حالت تشویشناک ہونے پر انہیں بینظیر ہسپتال منتقل کر دیا گیا ہے۔ خود کشی کی کوشش کرنے والے بچوں کی والدہ کا چند روز قبل انتقال ہوا تھا اور آج انہوں نے والد کی ڈانٹ سے دلبرداشتہ ہو کر چوہے مار دوا پی لی جس کے بعد ان کی حالت غیر ہونے پر ہسپتال منتقل کر دیا گیا۔ پولیس کے مطابق متاثرہ بچے بنی پولیس سٹیشن کی حدود میں باغ سرداراں نامی علاقے کے رہائشی ہیں جن میں 16 سالہ صدف، 13 سالہ وہاج، 12 سالہ سدرہ، 11 سالہ وہاب اور2 سالہ بسمہ شامل ہیں۔
بینظیر ہسپتال کے شعبہ ایمرجنسی کے ترجمان ڈاکٹر رفیق نے نجی ٹی وی کو بتایا کہ پانچوں بچوں کی حالت ہی تشویشناک ہے مگر 2 سالہ بسمہ اور 11 سالہ وہاب کی حالت زیادہ تشویشناک ہے جنہیں بچانے کی کوشش کی جارہی ہے۔ پولیس کے مطابق بچوں کےکسی عزیز کی جانب سے ابھی تک ہسپتال یا پولیس سے رابطہ نہیں کیا گیا تاہم کسی بھی قسم کی کارروائی عمل میں لائے جانےسے قبل بچوں کو بچانے کی کوشش کی جارہی ہے۔
یادرہے کہ بچوں کی جانب سے اس قسم کی کوششوں میں گزشتہ کچھ عرصے میں اضافہ دیکھا گیا ہے جب 2 اگست کو پنجاب کے ضلع اٹک میں 6 خانہ بدوش لڑکیوں نے گھریلو جھگڑے کے باعث گندم میں رکھی جانے والی گولیاں کھا لی تھیں ۔ حالت بگڑنے پر انہیں اسفدیار ہسپتال اٹک منتقل کیا گیا تاہم 3 لڑکیاں علاج شروع ہونے سے قبل ہی ہلاک ہوگئیں۔جبکہ اسی روز ایک دوسرے واقعہ میں 13 سالہ لڑکی نے بھی بڑی بہن کے ساتھ جھگڑے کے بعد غصے میں آ کر زہریلی گولیاں کھالی تھیں، جس سے وہ ہلاک ہوگئی۔

موضوعات:اجتماعی خودکشی ہولناک واقعہ