اسلام آباد( نیوز ڈیسک)مختلف ممالک میں شادی بیاہ کی رسومات مختلف ہوتی ہیں۔پاکستان میں کچھ تو کسی اور ملک میں کچھ اور۔شادی کے موقع پر سجنا سنورنا دلہن کی خاصیت ہے لیکن فی زمانہ دولہے بھی کسی سے کم نہیں ہیں اور شادی کی تقریبات سے پہلے بیوٹی سیلون پر پہنچے ہوتے ہیں جہاں ان کی نوک پلک سنوارنے کا کام انتہائی مہارت اور احتیاط کے ساتھ کیا جاتا ہے۔ اکثر جگہوں پر یہی روایت قائم ہے لیکن فلسطین میں دولہے کی ”ریش“ کی تراش خراش ایسے کی جاتی ہے کہ جاننے والا حیران رہ جائے۔ الجزیرہ ٹی وی کے مطابق شادی سے پہلے داڑھی منڈوانا عام سی بات ہے جس کیلئے بیوٹی سیلونز کا رخ کیا جاتا ہے لیکن فلسطین میں یہ ذرا مختلف طریقے سے ہوتا ہے اور دولہے کی داڑھی منڈانے کی باقاعدہ تقریب منعقد کی جاتی ہے جس میں رشتہ دار اور دوست احباب کی بڑی تعداد شریک ہوتی ہے ۔ ایک ماہر حجام دولہے کی سرعام داڑھی مونڈتا ہے جبکہ باقی لوگ تماشائی کا کردار ادا کرتے اور علاقائی گیت گاتے ہیں۔ دولہے کی داڑھی مونڈے جانے کے بعد دوست احباب اسے کندھوں پر اٹھا لیتے ہیں اور خوب مستی کرتے ہیں۔ کچھ لوگ تو سنو سپرے (جھاگ پیدا کرنے والا سپرے) استعمال کرتے ہیں جبکہ بعض لوگ سرف سے بنائے گئے جھاگ کی بالٹیاں دولہے پر انڈیل دیتے ہیں اور اس دوران دولہے کو نقصان پہنچنے کی بالکل بھی پرواہ نہیں کی جاتی۔
فلسطینی ثقافت کی ماہرنائلہ لابس کا کہنا ہے اس تقریب کا مقصد یہ نہیں ہوتا کہ دولہا خوبصورت نظر آئے اور اپنی دلہن کے پاس خوش شکل ہو کر جائے بلکہ ہم یہ کام ہم اس لیے کرتے ہیں تاکہ دنیا کو دکھا سکیں کہ ہمارے بیٹے کی شادی ہو رہی ہے اور وہ ایک مرد ہے :-