ماسکو(این این آئی)مشرقی روس کے ایک گاؤں میں لوگ یہ دیکھ کر اس وقت حیرت میں پڑگئے کہ جب انھوں نے صبح گرم پانی کے لیے نلکا کھولا تو اس میں سے پانی کے بجائے تیل نکل رہا تھا۔ایک مقامی نامی ویب سائٹ کا کہنا تھا کہ چیرسکی نامی گاؤں میں مرکزی ہیٹنگ نظام میں حادثہ پیش آیا تھا جس کے نتیجے میں تین ٹن سے زیادہ تیل پانی کی لائن میں لیک ہوگیا۔یہ لیک ہونے والا تیل پاس کی ندی تک بھی پہنچا جس سے اس کا پانی اور مٹی آلودہ ہوگئی۔سوشل میڈیا پر پوسٹ کی گئی ایک ویڈیو میں گاؤں کے ایک شخص کو اپنے گھر کے نلکے سے بالٹی بھرتے د یکھا جا سکتا ہے۔ اس نلکے سے گاڑھا، کالا مادہ نکل رہا ہے جو بلا شببہ تیل ہے۔چیرسکی گاؤں کے ایک باسی ایوون نے بتایا کہ ’یہاں تک کہ لوگ کچھ دھو بھی نہیں سکتے کیونکہ نلکے سے تیل اور پانی کی آمیزش سے آلودہ نکلنے والی چیز کی بو پیٹرول کی طرح ہے۔ یہ پوری طرح گندہ ہے۔حکام اب پانی کی سپلائی سے تیل کے تمام اثرات کو زائل کرنے کی کوشش کر رہے ہیں۔ ان کا کہنا تھاکہ ٹھنڈے پانی کی سپلائی میں تو کوئی خلل نہیں پڑا ہے اور پینے اور دھونے کے لیے اسی پانی کو ابال کر استعمال کریں۔مقامی حکام اور ماحولیات کے تحفظ سے وابستہ افسران نے اس لیک کی باضابطہ انکوائری شروع کر دی ہے۔چیرسکی میں بجلی کی سپلائی بھی ایک بڑا مسئلہ ہے اور یہ واقعہ ایک ایسے وقت پیش آیا جب گاؤں کے باسی ابھی 24 گھنٹے تک بجلی نہ ہونے کو جھیل چکے ہیں۔بجلی نہ ہونے کے سبب مقامی حکام ہسپتالوں میں کام کاج اور دیگر ضروری چیزوں کے لیے جنریٹر سے کام لے رہے تھے۔حکومت کے محکمہ توانائی کے اپنے ریکارڈز کے مطابق اس برس چیرسکی میں بجلی جانے کا یہ 23 واں واقعہ تھا۔