لاہور(این این آئی)پاکستان اورانگلینڈکی کرکٹ ٹیموں کے مابین چار ٹیسٹ میچوں کی سیریز کا چوتھا اور آخری ٹیسٹ آج ( جمعرات ) 11اگست سے اوول کرکٹ گراؤنڈمیں کھیلاجائے گا۔انگلینڈکوسیریزمیں2-1سے برتری حاصل ہے چوتھے ٹیسٹ میں پاکستان کی کامیابی کی صورت میں سیریز2-2سے برابرہوجائے گی جبکہ میچ ڈراہونے کی صورت میں انگلینڈیہ سیریز2-1سے جیت لے گااگرچوتھاٹیسٹ انگلینڈجیت جاتاہے تووہ 3-1کے واضح مارجن سے سیریزجیت لے گا۔دونوں ٹیموں 6سال بعداوول کرکٹ گراؤنڈمیں مدمقابل ہونگی۔ اس سے قبل اوول میں پہلاٹیسٹ میچ12اگست1954ء کوکھیلاگیاجوپاکستان نے24رنزسے جیتا اور آخری ٹیسٹ 18اگست2010کوکھیلاگیاجوپاکستان نے4وکٹوں سے جیتا۔اوول میں دونوں ٹیموں کے مابین 9ٹیسٹ میچ کھیلے گئے جن میں سے 4میچ پاکستان نے جیتے،3میچ انگلینڈنے جیتے اور2میچ ڈراہوئے۔اوول کرکٹ گراؤنڈمیں23500تماشائیوں کے بیٹھنے کی گنجائش ہے اوریہ میدان1845میں بنا۔معروف کرکٹ ویب سائٹ کے مطابق پاکستان کی متوقع ٹیم میں افتخاراحمد،سمیع اسلم،اظہرعلی،یونس خان، مصباح الحق(کپتان) اسد شفیق، سرفرا زاحمد(وکٹ کیپر)یاسرشاہ، محمد عامر، سہیل خان اور راحت علی شامل ہونگے۔