مانچسٹر (آئی این پی)پاکستانی فاسٹ بولر محمد عامر کے ساتھ اولڈ ٹریفورڈ سٹیڈیم میں وہی ہوا جس کا پاکستانیوں کو پہلے سے ہی خطرہ تھا۔ پاکستان اور انگلینڈ کی ٹیموں کے درمیان کھیلے جارہے دوسرے ٹیسٹ میچ کے دوران انگلش شائقین محمد عامر کو نوبال، نوبال کہہ کر چڑاتے رہے۔برطانوی میڈیا کے مطابق 2010 میں سپاٹ فکسنگ کرکے نو بال کرانے والے محمد عامر پانچ سالہ پابندی ختم ہونے کے بعد حال ہی میں کرکٹ میں واپس آئے ہیں تاہم ابھی ان کی مشکلات ختم نہیں ہوئیں کیونکہ محمد عامر کو انگلینڈ کے خلاف کھیلے جانے والے دوسرے ٹیسٹ میچ کے دوران شدید ہوٹنگ کا سامنا کرنا پڑا اور انگلش شائقین کرکٹ انہیں نوبال، نوبال کہہ کر چڑاتے رہے۔دوسری طرف برطانوی کپتان الیسٹرکک نے کہا ہے کہ محمد عامر پر ہونے والی ہوٹنگ پر مجھے کوئی حیرانی نہیں ہوئی کیونکہ پاکستانی فاسٹ بولر نے جو کیا ہے اس پر عوامی ردعمل فطری بات ہے۔