ممبئی(مانیٹرنگ ڈیسک) بالی ووڈ کے دبنگ خان نے والدین کے آگے ہتھیار ڈالتے ہوئے شادی کی حتمی تاریخ کا اشارہ دے دیا۔بھارتی میڈیا کے مطابق سلمان خان اور رومانیہ کی ٹی وی اداکارہ لولیا وینتر کی شادی کے چرچے زبان زدعام تھے لیکن اب سلمان خان نے شادی کی تصدیق کرتے ہوئے شادی کی تاریخ کا بھی اعلان کردیا ہے۔ بھارتی ٹینس کھلاڑی ثانیہ مرزا کی زندگی پر لکھی گئی کتاب کی رونمائی کی تقریب کے موقع پر صحافیوں نے جب ان سے شادی سے متعلق سوال کیا تو ان کا کہنا تھا کہ 18 نومبر کو وہ سہرا سجائیں گے۔صحافیوں نے سلوں میاں سے 18 نومبر کی وضاحت چاہی تو ان کا کہنا تھا کہ گزشتہ 20 سال 25 سالوں سے 18 نومبر کی تاریخ رکھی ہوئی ہے لیکن شادی ہوگی اور ضرور ہوگی اور 18 نومبر کو ہی ہوگی۔ دبنگ خان کی شادی کی تاریخ رواں سال کی ہے یا آئندہ سال کی تاہم ان کا کہنا ہے کہ والدین اور ان کی بہن آرپیتا خان کی شادی بھی اسی تاریخ کو ہوئی تھی اس لئے وہ 18 نومبر کو شادی کرلیں گے۔
دوسری جانب سلمان خان کی شادی کے حوالے سے بھارتی میڈیا میں مختلف قیاس آرائیاں کی جارہی ہیں سلوں میاں نے اپنے والدین کے سامنے ہتھیار ڈالتے ہوئے رواں سال ہی شادی کرنے کا حتمی فیصلہ کرلیا ہے اور رومانیہ سے تعلق رکھنے والی ٹی وی اداکارہ لولیا وینتر ہی اداکار کی شریک ہمسفر ہوں گی۔واضح رہے کہ بالی ووڈ سپر اسٹار سلمان خان کے ان دنوں رومانیہ کی ٹی وی اداکارہ لولیا وینتر سے معاشقے کے چرچے میڈیا کی زینت بنے ہوئے ہیں اس لئے غالب امکان ہے کہ لولیا وینتر ہی 18 نومبر کو ان کے نکاح میں آئیں گی۔