لاہور (ا ین این آئی) پاکستان کرکٹ بورڈ نے آئی سی سی کی جانب سے ٹیسٹ کرکٹ کو دو درجوں میں تقسیم کرنے کی تجویز کی حمایت کردی ۔برطانوی نشریاتی ادارے کو انٹرویو کے دوران چیئرمین پی سی بی شہریار خان کا کہنا تھا کہ آئی سی سی کی جانب سے ٹیسٹ ٹیموں کو 2گروپ میں تقسیم کرنے کی مکمل حمایت کرتے ہیں، اس سے تمام ٹیموں کو ایک دوسرے کے خلاف کھیلنے کا موقع ملے گا جب کہ پاکستان چاہتا ہے کہ ٹیسٹ سیریز کا پروگرام آئی سی سی کے ہاتھ میں ہو۔ انہوں نے کہا کہ پاکستانی ٹیم اپنی عالمی رینکنگ کی بنیاد پرٹیسٹ کرکٹ کے اول گروپ میں ہوگی جبکہ بنگلہ دیش اور سری لنکا کی جانب سے مخالفت کی وجہ یہ ہے کہ ان کی ٹیمیں اس وقت عالمی رینکنگ میں نیچے ہیں لیکن اس بات سے قطع نظر کہ پاکستان ٹیسٹ کرکٹ کے اوپر والے درجے میں ہو یا نچلے درجے میں وہ اس 2گروپ ٹیسٹ کرکٹ کی حمایت کرے گا۔انہوں نے کہا کہ ٹیموں کی دو گروپوں میں تقسیم کے بارے میں لوگوں میں غلط فہمی یہ ہے کہ اس میں بڑی ٹیمیں کمزور ٹیموں سے نہیں کھیلیں گی حالانکہ ایسا نہیں ہے، اس میں ترقی اور تنزلی کا طریقہ کار موجود ہے لہذا ہر ٹیم کو ایک دوسرے سے کھیلنے کا بھرپور موقع ملے گا۔ ان کا کہنا تھا کہ امید ہے کہ آئی سی سی بنگلہ دیش اور سری لنکا کو دو گروپ میں ٹیموں کی تقسیم کے بارے میں قائل کرنے میں کامیاب ہوجائے گی۔آئی سی سی ٹیسٹ رینکنگ میں سری لنکا ساتویں اور بنگلہ دیش نویں پوزیشن پر ہے جب کہ دونوں کرکٹ بورڈز سے آئی سی سی کے حالیہ اجلاس کے دوران ٹیموں کو 2 گروپ میں تقسیم کرنے کی تجویز کی مخالفت کی تھی۔واضح رہے کہ آئی سی سی کے اجلاس میں تجویز سامنے آئی تھی کہ 2019ء سے ٹیسٹ کرکٹ کھیلنے والی ٹیموں کو 2گروپ میں تقسیم کردیا جائے جس میں عالمی رینکنگ کی پہلی 7ٹیمیں ایک دوسرے کے خلاف کھیلیں گی جبکہ 2نئی ٹیسٹ ٹیموں کو موجودہ 3ٹیموں کے ساتھ شامل کرکے ان کے میچ کرائے جائیں گے اور دونوں گروپ میں ٹیموں کی کارکردگی کی بنیاد پر ترقی اور تنزلی ہوا کرے گی۔