ریاض(مانیٹرنگ ڈیسک)سعودی عرب میں کولمبیا کے ایک فیشن ڈیزائنرنے بلٹ پروف لباس متعارف کردیا ،مردوں کے لیے پورے سوٹ کی قیمت 6 سے 8 ہزار ڈالر کے درمیان ہے جب کہ صرف جیکٹ کی قیمت 3.5 ہزار ڈالر ہے۔میڈیارپورٹس کے مطابق کابالیرو جو بڑی شخصیات کے لیے کم وزن بلٹ پروف لباس تیار کرنے کے حوالے سے معروف ہیں، کا کہنا تھا کہ ان کا ایک کلب ہے جس کے ارکان وہ لوگ ہوتے ہیں جو ان کے تیار کیے گئے لباس کی وجہ سے محفوظ رہے۔ کابالیرو کے مطابق ابھی تک اس کلب کے ممبران کی تعداد 20 ہوچکی ہے۔انہوں نے کہاکہ انہیں زیادہ خوشی کا احساس مال اور کام حاصل کرنے سے نہیں بلکہ جانوں کے بچانے سے ہوتا ہے۔یاد رہے کہ کابالیرو کا کام 23 ممالک تک پھیلا ہوا ہے جب کہ وہ نسبتا کم متاثر کرنے والی مصنوعات تیار کرتے ہیں۔ ان مصنوعات میں فوج اور پولیس کے لیے بارودی سرنگوں کے دھماکوں اور گولیوں سے محفوظ رکھنے والی جیکٹیں شامل ہیں۔