بیونس آئرس (مانیٹر نگ ڈیسک )ارجنٹائن اور بارسلونا کے فاروڈ فٹبالر 29 سالہ لیونل میسی نے بین الاقوامی فٹبال سے ریٹائرمنٹ کا اعلان کر دیا ہے۔میسی نے چلی کے خلاف کوپا امریکہ کپ کے فائنل میں پینالٹی شوٹ ضائع کر دی جس کے بعد ان کی ٹیم یہ فائنل ہار گئی۔ریٹائرمنٹ کا اعلان کرتے ہوئے میسی کا کہنا تھا ’ قومی ٹیم کے لیے میرا سفر تمام ہوا۔ میں جو کر سکتا تھا، کر لیا۔ چیمپیئن نہ بننے کادکھ ہے۔ارجنٹائن کے ٹی وی پر بات پر کرتے ہوئے انھوں نے کہا ’میں اپنی قومی ٹیم کی جانب سے دوبارہ نہیں کھیلوں گا۔‘لیونل میسی کا یہ اعلان کوپا امریکہ کپ کے فائنل میں ارجنٹائن کی چلی کے ہاتھوں شکست کے بعد سامنے آیا ہے۔سنہ 2005 میں ارجنٹائن کی جانب سے اپنے کریئر کا آغاز کرنے والے والے میسی کا یہ 112 واں بین الاقوامی میچ تھا۔ارجنٹائن اور چلی کے درمیان کھیلا جانے والا کوپا امریکہ کپ کا فائنل 120 منٹ تک بغیر کسی گول کے برابر رہا جس کے بعد اس کا فیصلہ پینالٹی شوٹ آؤٹ پر ہوا۔چلی نے پینالٹی شوٹ آؤٹ میں ارجنٹائن کو دو کے مقابلے میں چار گول سے شکست دے کر مسلسل دوسری بار یہ اعزاز حاصل کیا۔واضح رہے کہ سنہ 2008 کے بیجنگ اولمپک میں سونے کا تمغہ حاصل کرنے کے بعد لیونل میسی نے کوئی بڑا بین الاقوامی اعزاز نہیں جیتا۔سنہ 2014 کے فٹبال کے عالمی کپ کے فائنل میں جرمنی نے ارجنٹائن کو ایک صفر سے ہرایا تھا۔