لاہور( مانیٹرنگ ڈیسک )معروف صوفیانہ گلوکارہ عابدہ پروین نے کہا ہے کہ امجد فرید صابری امن کا سفیر تھا اور ان کی شہادت سے پوری قوم سوگوار ہے ،دہشتگردوں اور انتہا پسندوں کو پاکستان کا خوبصورت اور پر امن چہرہ مسخ کرکے پیش کرنے کی اجازت نہیں دی جائے گی ۔ ایک انٹر ویو میں عابدہ پروین نے کہا کہ امجد فرید صابری نے اپنے فن کے ذریعے پوری دنیا میں پاکستان کا نام روشن کیا ۔ امجد فرید صابری امن کا سفیر ،ایک خوش اخلاق اور پیار کرنے والی شخصیت تھے اور آج بھی یقین نہیں آرہا کہ انہیں شہید کر دیا گیا ہے ۔ انہو ں نے کہا کہ پوری قوم دہشتگردوں اور انتہا پسندوں کا قلع قمع کرنے کے لئے متحد ہے اور دہشتگردی کیخلاف جنگ میں اپنی افواج کی پشت پر کھڑی ہے ۔ عابد پروین نے کہا کہ اللہ تعالیٰ سے دعا ہے کہ امجد فرید صابری کو اعلیٰ مقام اور انکے اہل خانہ کو صبر جمیل عطا کرے ۔