لندن (مانیٹرنگ ڈیسک)پاکستان کرکٹ ٹیم کے کپتان مصباح الحق نے کہاہے کہ دورہ انگلینڈ چیلنج ہے تاہم قومی ٹیم کے جیت کیلئے جذبے بلند ہیں ٗٹیم نے انگلینڈ میں ہمیشہ اچھا کھیلا ہے ٗکھلاڑی مداحوں کو مایوس نہیں کرینگے ۔ایک انٹرویو میں انہوں نے کہا کہ دورہ انگلینڈ ایک چیلنج ہے لیکن چیلنج ہمیشہ کھیل کو بہتر کرنے اور جیتنے میں مددگار ہوتا ہے۔اگر ایک ٹیسٹ میں 350 رنزبنانے میں کامیاب ہوئے تو ہماری جیت کے امکانات روشن ہوں گے۔کپتان نے کہا کہ ہماری بولنگ بھی بہترین ہے جو دنیا کی مضبوط ترین بیٹنگ لائن کو تباہ کرنے کی صلاحیت رکھتی ہے، یہ دورہ ہمارے کھلاڑیوں کو پاکستان کی جیت میں دہرا کردار ادا کرنے کا موقع ہوگا۔مصباح الحق پاکستان کے کامیاب کپتانوں میں سے ایک ہیں تاہم ابھی تک انگلینڈ میں اپنا پہلا ٹیسٹ کھیلیں گے ان کا کہنا تھا کہ ہمیں انگلینڈ کی کنڈیشنز سے مرعوب ہوئے بغیر اپنی پوری توجہ مرکوز کرنے کی ضرورت ہے۔ٹیسٹ کرکٹ سے کنارہ کشی کے حوالے سے ایک سوال پر انہوں نے کہاکہ میں نے تاحال اس حوالے سے کوئی فیصلہ نہیں کیا۔چیف سلیکٹر سے تعلقات پر مصباح نے کہا کہ بہت اچھے تعلقات ہیں چونکہ انضمام الحق پاکستان ٹیم کی قیادت کرچکے ہیں اس لیے وہ جانتے ہیں کہ کپتان کیا سوچتا ہے اور اس کی ضرورت کیا ہے۔