اسلام آباد (این این آئی)پاکستان کرکٹ بورڈ(پی سی بی) نے پاکستان سپر لیگ کے دوسرے ایڈیشن کیلئے عالمی شہرت یافتہ نیوزی لینڈ کے برینڈن میک کولم اور مچل جانسن سے رابطے شروع کر دئیے ہیں اور ان کے اگلے ایڈیشن میں شرکت کے قوی امکانات ہیں۔میڈیا رپورٹ کے مطابق رواں سال کے آغاز میں منعقدہ پاکستان سپر لیگ(پی ایس ایل) کے پہلے ایڈیشن کی شاندار کامیابی کے بعد پی سی بی حکام نے فرنچائز کے ساتھ مل کر دوسرے ایڈیشن کو حتمی شکل دینے کی تیاریاں شروع کر دیں۔پی ایس ایل حکام کے مطابق لیگ کی انتظامیہ تمام فرنچائز کو تفصیلات اور طریقہ کار سے آگاہ کردیا ہے اور اب ٹیمیں دوسرے ایڈیشن کے منصوبوں پر کام کر رہی ہیں۔پی ایس ایل آفیشل کے مطابق اگر کوئی ٹیم کسی کھلاڑی کو برقرار نہیں رکھنا چاہتی تو وہ پانچ مئی سے نو ستمبر تک اس سلسلے میں کورروائی کرتے ہوئے دوسری ٹیموں سے کھلاڑیوں کے ٹرانسفر پر بات کر سکتی ہے اور وہ جن کھلاڑیوں کو برقرار نہ رکھنا چاہے انہیں ریلیز بھی کر سکتی ہے ٗٹرانسفر ونڈو 20 جون کو کھلے گی اور نو ستمبر تک یہ عمل جاری رہے گا۔پی ایس ایل آفیشل نے مزید بتایا کہ پی ایس ایل کے ڈرافٹ میں نئے ناموں کو شامل کرنے کیلئے بھی پانچ ستمبر تک شکل دی جا سکتی ہے جبکہ ڈرافٹ سسٹم کے ذریعے کھلاڑیوں کے انتخاب کا عمل اکتوبر کے وسط میں ہو سکتا ہے۔انہوں نے بتایا کہ حکام نیوزی لینڈ کے سابق کپتان برینڈ میک کولم اور سابق آسٹریلین فاسٹ باؤلر مچل جانسن سے رابطے میں ہیں اور دونوں کھلاڑیوں کی اگلے ایڈیشن میں شرکت متوقع ہے۔پی ایس ایل کے اعلیٰ آفیشل کے مطابق لیگ کے نو فروری سے متحدہ عرب امارات میں انعقاد کا امکان ہے تاہم لیگ کے کہیں انعقاد کے حوالے سے سوال کا انہوں نے جواب نہیں دیا۔